Îstanbul – Dayîkê Şemeyî hewteyo 1127. yê çalakîya xo de aqûbeta qurbananê Kerboranî persayî.
Dayîkê/Merdimanê Şemeyî bi waştişê “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 1127. de Meydanê Galatasarayî yê Îstanbulî de çalakîya xo ya hewteyîye kerde. Dayîkê Şemeyî, endam û îdarekarê Şûbeya ÎHD’yî ya Îstanbulî û zaf pawitoxê heqanê merdiman tewrê çalakîye bîyî. Çalakîye de fotografê vîndîkerdeyan destan de bîyî. Çalakîya na hewte de dayîkan aqûbeta nê kesan pers kerd ke Kerboran de destbend bîbî û ameyêbî kiştiş: Davut Altunkaya (12 serre), Seyhan Dogan (13 serre), Nedîm Aykon (16 serre), Mehmet Emîn Aslan (19 serre), Abdurrahman Olcay (20 serre), Abdurrahman Coşkun (21 serre) û Suleyman Seyhan (57 serre).
Metnê eşkerayîye Merdima Şemeyî Gamze Elvane wend.
‘Vatbi ke ma badê tehqîqatî ê verdayî’
Gamze Elvane ard ziwan ke ê hewteyo 1127. de zî meydan de mucadele kenê. Aye wina va: “No hewte ma derheqê dosyaya Kerboranî de agahîyan pare kenê. Derheqê na dosya de qerarê ravîyartişê demî ame dayîş. 29ê teşrîna verêna 1995î û 8ê adara 1996î de qezaya Kerboranî ya Mardîn de zaf kesî destbend bîbî. Kesê destbendkerdeyî Taburê Cendirmeyan yê Kerboranî de yenê tepiştiş. Demêk dima tayê kesê destbendkereyî ameyî veradayîş. La Davut Altunkaya (12 serre), Seyhan Dogan (13 serre), Nedîm Aykon (16 serre), Mehmet Emîn Aslan (19 serre), Abdurrahman Olcay (20 serre), Abdurrahman Coşkun (21 serre) û Suleyman Seyhan (57 serre) ra tu agahî nêame girewtiş. Mesulan merdimanê vîndîyan rê va: ‘Badê tehqîqatî ma ê verdayî.’ Hedîse ra 4 aşmî dima 6ê adara 1996î de cesedê Suleyman Seyhanî yo bêsere û veşnaye yew bîrî de ame dîyayîş. Di rojî badê dîyayîşê Suleyman Seyhanî, çawişo uzman Bîlal Batirir ke Taburê Cendirmeyan yê Kerboranî de wezîfedar bî, vîndî bî.”
‘Rixmê delîlan zî dadgehî 18 kesî beraet kerd’
Gamze Elvane dewamê qiseykerdişê xo de dîyar kerd ke waştişê keyeyan bêcewab mendî. Aye wina dewam kerd: “Demêk dima seba tehqîqatan qerarê ‘tehqîqat lazim nîyo’ ame dayîş. La waştişê keyeyan netice da. Bi muracatê Şûbeya ÎHD’yî ya Colemêrgî û xebatanê Şûbeya ÎHD’yî ya Mardînî 29ê gulana 2009î de dawa reyna ame akerdiş. Dima raştî vejîya meydan ke kesê destbendkerdeyî ameyê kiştiş. Mabênê serranê 2012 û 2015î de goreyê şahîdanê ê wextî esteyê vîndîbîyayan ameyî dîyayîş. Dima Dozgerîye derheqê 18 kesan de tehqîqat akerd. Fermandar Hurşît Îmren, Fermandarê Cendirmeyan ê Qerekolê Kerboranî Mahmut Yilmaz, ardimkarê fermandarîya qerekolî Haydar Topçam, çawişê uzmanî û cerdewamî zî mîyanê înan de bîyî. Dawa Dadgehê Cezayî yê Giranî yê 1. yê Semsûrî de ame dîyayîş. Agahîyê vîndîkerdişê vîndîbîyayan qeydanê dadgehî de ca girewt. La rixmê delîlan zî dadgehî 4ê temmuza 2022î de derheqê 18 kesan de qerarê beraetî da. Serra 2026î de Dadgehê Berzî bi mana ke 30 serrî temam bîyê, dawa girewt. Ma tîya venga heme kesan danê ke seba Davut Altunkaya (12 serre), Seyhan Dogan (13 serre), Nedîm Aykon (16 serre), Mehmet Emîn Aslan (19 serre), Abdurrahman Olcay (20 serre), Abdurrahman Coşkun (21 serre), Suleyman Seyhan (57 serre) û seba heme vîndîbîyayan edalet biwazê.”
Çalakîya meydanî bi ronayîşê qurnefîlan qedîya.
