Ankara – Konferansê ‘Ma pîya derheqê ameyoxî de qisey kenê’ dest pêkerd. Konferans ser vengdayîşê 80 cinîyan ame organîzekerdiş. Mîyanê înan de rojnamegerî, nuştoxî, aktîvîstî, akademîsyenî û sîyasetmedarî est ê.
Konferansê ‘Ma pîya derheqê ameyoxî de qisey kenê’ salonê Odaya Endezyaranê Înşaatî yê qezaya Çankaya ya Ankara de dest pêkerd. Îpek Ere hetê çawişo uzman Musa Orhanî ra ameyêbî qetilkerdiş. Dayîka aye Hîkmet Kilinçe bi resimê keyna xo û desmala kesk, sûr û zerde tewrê konferansî bîye. Hemserekeya Pêroyî ya DEM Partî Tulay Hatîmogullari, endama Heyetê Îmrali yê DEM Partî Pervîn Buldane, aktîvîstê Têgêrayîşê Cinîyanê Azadan (TJA) zî tewrê konferansî bîyî. Sazgeh û rêxistinê cinîyan, endam û temsîlkarê partîyanê sîyasîyan, sazgehê sîvîlî û bi seyan cinîyî zî uca bîyî. Konferansê cinîyan do di rojî dewam bikero.
Konferans bi qiseykerdişê akerdişî yê kaybaze Rugeş Fîlîze dest pêkerd. Rugeş Fîlîze dîyar kerd ke ê do qisey bikerê ke cinîyî aştîyêka senêne wazenê û ameyoxê xo senî dîyar bikerê. Aye wina va: “Aştîye tena bêvengkerdişê çekan nîya. Aştîye wedaritişê tersî û bêvengnêkerdişê nasname û ziwanan a. Bêrê ma ferqanê yewbînan rê rêz bigîrê û mucadeleyê xo pîya bikerê. Ma hêvî kenê ke no konferans seba ke ma bêrê kişta yewbînan, bibo destpêkêk.”
Badê qiseykerdişê akerdişî vatoxan Îlkay Akkaya, Cansu Çamlibele û muzîsyen sehne ser o kilamî vatî. Badê kilaman roja yewine ya konferansî do bi roniştiş û foruman dewam bikero. Roja yewine ya konferansî de do roniştişêk û 2 forumî bêrê organîzekerdiş.
Programê konferansî yê ewroyî wina yo:
Roniştişo yewin ê forumî: Azadî, demokrasî, edalet û hemwelatîya seyyewbîne
Moderatore: Akademîsyen Cansu Çamlibele
Qiseykerdoxî: Endama Înîsîyatîfê Hewcedarîya Mi bi Aştîye Esta Ferîde Eralpe, zanaya sîyasetî Fusun Ustele, sîyasetmedara kurde Gultan Kişanake, nuştoxe Hîdayet Şefkatlî Tuksal, sîyasetmedare Zeynep Altiok Akatli
Roniştişo dîyin ê forumî: Ma vera kapîtalîzm û îstîsmarê kede derheqê mucadeleyê kede de qisey kenê
Moderatorî: Çîlem Kuçukkeleşe û Gulsum Kave
Heqê qiseykerdişî yê heme cinîyan o.
Roniştişo hîrêyin ê forumî: Ma derheqê mucadeleyê azadîye û seyyewbînîya cinsîyetî de qisey kenê
Moderatorî: Defne Guzele û rojnamegere Reyhan Hacioglu
Heqê qiseykerdişî yê heme cinîyan o.
Konferans do meşte zî bi roniştişêk û 2 foruman dewam bikero. Uca do derheqê babetanê cîya cîyayan de qisey bêro kerdiş.
