Çawişo pisporo verên Mûsa Orhan ke verê cû seba Îpek Er bi sucê “hêrişê cinsî yo giran” 10 serrî cezaya hepsî girewtbî, na reye dewa de ke tede bi sucê “hetdayîşê xokiştişî” ame hukmkerdene, beraet kerd.
Îpek Er 7ê temmuze 2020î de Serdozgerîya Komare ya Sêrtî rê muracat kerdbî û Mûsa Orhanî ra ke Beşîrî de wezîfedar bî, gerre kerdbî ke hêrişê cinsî kerdo aye ser o. Îpek Ere 16ê temmuze 2020î de mektubêk verdaye û întîhar kerd û badê 34 rojan 18ê tebaxe 2020î de cuya xo ra bîye. Orhan ame destbendkerdene, badê reaksîyonan ame tepîştene û hewteyêk ra pey ame tehlîyekerdene, dima Fermandarîya Pêroyî ya Cendirmeyan ra ame îxrackerdene. Dadgehê Cezaya Giran 1. yê Sêrtî kanûna 2021î de 12 serrî cezaya hepsî daye Orhanî, ceza bi kêmkerdişê teqdîrî ameye ardene bi 10 serran û Dadgehê Edlîye yê Herême yê Amedî na ceza goreyê huqûqî dîye.
