Hatîce Yildize Hepisxaneyê Bakirkoyî de ya û nêweşîyê ci xeylîyê. Lajê ci Ferhat Yildiz vano ke îdareyê hepisxaneyan tepîştîyanê sîyasîyan rê qanûno cîya xebitnenê.
Hatîce Yildiza, ke 77 serrîya, Hepisxaneyê Bakirkoyî de ya. Lajê ci Ferhat Yildizî ard ziwan ke dayîka ey de xeylî nêweşî est ê, labelê hema zî nêameya verdayene.
Ferhat Yildizî vat ke nêweşîyê demans, şekir, tansîyon û skolyozî dayîka ey de est ê û estîyê ci helîyenê. Pişta ci de fitiq est o û çimê ci kêmî vînenê. Hatîce Yildize seba keyna xo ya ke hepisxane de ya pere rusnabî, coka dewa vera ci ame akerdene û serra 2024î de ceza ci rê ame birnayene. Wexto ke polîsî a bi sedye keye ra berde hepisxane, a 75 serre bîye.
Nêweşîyê Hatîce Yildize demê reyde zêde bîyî û êdî hepisxane de xo bi xo pêdîyayîşanê xo nêeşkena ca bîyoro. Mîyanê hewteyî de çend rey şina revîr û xeylî rey zî ameya berdene nêweşxane. Labelê ATK’yî (Sazîya Tibbê Edlî) di rey qerar da ke Hatîce Yildize eşkena hepisxane de bimana.
‘Seba tepîştîyanê sîyasîyan qanûno cîya yeno xebitnayene’
Ferhat Yildizî vat ke ma seba veradayîşê bi şert waştiş kerd, labelê waştişê ma ame redkerdene. Daxwaznameyo ke ma bi avûkatî reyde rusna zî nêame qebûlkerdene. Hatîce Yildize gulana 2027î de ganî bêro veradayene. Ey ard ziwan ke ewro hezaran tepîştîyê nêweşî est ê û vat: “Îdareyê hepisxaneyan vanê ke eke merdim tepîşteyo sîyasî bo, eşkeno hepisxane de bimano.”
Ferhat Yildizî vat “Maya mi Hatîce Yildize derheqê prosesî de vat ke, ‘ganî verê her çî tepîştîyê nêweşî bêrê veradayene. Eke tepîştîyê nêweşî bêrê veradayene, ma do bizanê ke proses est o.’ Ewro şarê ma zî vano ke ‘Bila tepîştîyê nêweşî bêrê berdayene ke proses aver şiro.’ Ma zî wazenê ke embazê ma yê tepîştîyî bêrê veradayene. Eke embazê ma bêrê veradayene, proses zî heta peyê do bişîyo.”
