Riha – Şûbeya OHD û TUHAY-DER’î yê Riha raporê binpaykerdişê heqan yê hepisxaneyan eşkera kerd. Raporî de ame dîyarkerdiş ke 4 hepisxaneyan de rewşa 15 girewteyan giran a û wina ame vatiş: “Ganî Celal Yildirim û heme girewteyê nêweşê giranî tavilî bêrê veradayîş û caardişê veşnayîşê înfazan biqedîyo.”
Şûbeya OHD û TUHAY-DER’î yê Riha verê Dadgehê Riha de bi eşkerayîyêk raporê xo yê hepisxaneyan eşkera kerd. Endam û rayberê partîyanê sîyasîyan û sazgehanê demokratîkan ê komelkî tewrê eşkerayîye bîyî. Eşkerayîye hetê Hemsereka TUHAY-DER’î ya Riha Ayla Ozdemîr Varli ra ame wendiş.
‘15 girewteyî nêweşê giranî est ê’
Ayla Ozdemîr Varli dîyar kerd ke Prosesê Aştî û Komelê Demokratîkî dewam keno zî hepisxaneyan de binpaykerdişê heqan, astengkerdişê heqê tedawîye û qerarê dergkerdişê înfazan dewam kenê. Aye bale ante rewşa Hepisxaneyê Hûmare 2 yê Riha, Hepisxaneyê Hûmare 2 yê Sêwregi, Hepisxaneyê Tîpê T yê Tokat û Hepisxaneyê Hûmare 2 yê Osmanîye ser o û vat ke goreyê tesbîtan 25 girewteyanê nêweşan ra rewşa 15 girewteyan sewîyeya nêweşîya girane de ya.
Ayla Ozdemîr Varli rewşa girewteyê nêweş Celal Yildirimî vîr arde ke Hepisxaneyê Riha de yeno tepiştiş. Aye dîyar kerd ke Celal Yildirimî 2yê teşrîna verêne de krîzê zerrî derbas kerdo, badê anjîyoyî damarê ey de stent ameyo ronayîş û dima reyna krîzê zerrî derbas kerdo: “Bi na rewşe ke tehlukeya cuye tede est a zî, waştişê ey yê taloqkerdiş înfazî hetê Heyetê Îdare û Çimdarîye ra ameyo redkerdiş. Sewbîna rewşa girewteyanê nêweşan Abdulkadîr Kaya, Serhat Polatsoy, Omer Gul, Ahmet Tunelî, Omer Koyun, Cemal Ozguç, Hasan Demîrtaş, Mehmet Tîryakî, Omer Yaman, Suat Oguz, Şukru Abdo, Emîn Çetîntaş, Mehmet Îsa Aydogan û Şerîf Dogan zî giran a û hewcedarîya înan bi taqîbkerdişê weşîye yo domdar est a.”
‘Qerarê dergkerdişê înfazan’
Ayla Ozdemîr Varli dewamê eşkerayîye de bale ante qeraranê Heyetanê Îdare û Çimdarîye ser o ke derheqê înfazanê girewteyan de dayê û wina vat: “Hepisxaneyê Riha de înfazê Zeynel Karakaşî 3 aşmî û yê Maksut Durmuşî 6 aşmî ame taloqkerdiş. Sêwregi de înfazê Ahmet Tunelîyî reya 4. ame dergkerdiş, înfazê Orhan Tazeyî ame taloqkerdiş û yê Halîl Îbrahîm Arslanî zî serrêk ame dergkerdiş. Tokat de înfazê Cuneyt Aslanî 3 aşmî û Osmanîye de zî yê Emîn Çetîntaşî reya dîyine nêzdîyê serrêk ame dergkerdiş.”
‘Venga lezabez Wezaretê Edaletî rê’
Ayla Ozdemîr Varli peynîya qiseykerdişê xo de venga Wezaretê Edaletî û sazgehanê eleqedaran da ke seba pawitişê heqê cuyayîşê girewteyanê nêweşan, veradayîşê lezabez yê Celal Yildirim û heme girewteyanê nêweşanê giranan û qedênayîşê caardişê dergkerdişê înfazan gamê huqûqî bêrê eştiş.
