Hemwelatîyanê Riha û Wekîlê DEM Partî Omer Ocalanî destpêkê serra newîye ya perwerdeyî de vat ke ganî dewlete berpirsîyarîya xo bîyaro ca, asîmîlasyonî bivindarno û heqê perwerdeyê bi ziwanê dayike nas bikero.
Serra perwerdeyî 14ê êlule de heme Vakurê Kurdîstan û Tirkîya de dest pêkerd, la reyna sey her serre bi mîlyonan gedeyê kurdan bi mecbûrî bi tirkî perwerde vînenê.
Mehmût Bînîcîyî vat ke dare kokê xo ser o, merdim ziwanê xo ser o beno pîl: “Ma wazenê mekteb û cayanê fermîyan de bi ziwanê dayika xo hîs û fikranê xo bîyarê ziwan û perwerde bivînê. Eke kultur çin bo, merdimîye zî nêmanena. Nê prosesê aramîye de ganî dewlete nê heqê xozayî bigîro çiman ver; ma wazenê nê erdê pîrozî ser o ziwanêko hende pîroz û kehen bi fermîyet bêro naskerdene.”
Nesîbe Kuçukkiliç vat ke ziwanê înan cuye û estbîyayîşê înan o: “Eke ziwanê ma nêbo, ma nêeşkenê biciwîyê. Ganî ma her war de gedeyanê xo reyde bi ziwanê dayike qisey bikerê. Ma kurd ê û ganî ma kurdîtîya xo dewam bikerê.”
Hemsereka DBPyî ya Sêwregi Mizgîne Kuçukkiliç vat: “Eke ma gedeyanê xo reyde bi ziwanê dayike qisey nêkerê, ziwanê ma asîmîle beno. Ma wazenê statuyê ziwanê ma bêro naskerdene, kurdkî bibo ziwanê fermî û mekteban de bêro dayene.”
Wekîlê Riha yê DEM Partî Omer Ocalanî vat ke nuqtaya tewr muhîme ya têkoşînê serran ziwanê kurdkî yo: “Wexto ke neteweyêk ziwanê xo vindî keno, zaf çîyanê xo vindî keno. Senî ke kurdî hemwelatîyê nê welatî yê û wezîfeyanê xo anê ca, ganî dewlete zî berpirsîyarîya xo vera kurdan bîyaro ca. Ma wazenê kurdkî bibo ziwanê perwerde û fermî; no waştişêko xozayî yo. Seserra 21. de munaqeşekerdişê estbîyayîş û çinbîyayîşê ziwanêkî şerm o. Ma vera perwerdeyê bi tirkî nîyê, la ma sey kurdan wazenê perwerde bi ziwanê ma bêro dayene. Şarê kurdan bi seserran o na cografya ser o ciwîyeno; nika ra pey zî ganî gedeyê ma bi nasname û xobîyayîşê xo tîya de biciwîyê. Ma nêverdanê ke kes êdî vajo ‘kurdî ziwanê xo nêwazenê’. Ziwanê ma ziwanêko dewlemend û şaristanî yo; ma bi ziwanê xo sereberz ê.”
