Rêxistina DEM Partî ya Anqara bi waştişê cîyakerdişê budçeyî seba perwerdeyê bêpere û heqê ziwanê dayîke, vernîya Wezaretê Perwerdeyî de eşkerayî daye. Hemserekê DEM Partî yê Anqara Yilmaz Yildirimcî da zanayene ke heqê ziwanê dayîke hîmê aştî yo û waşt ke waştişê înan bêrê caardiş.
Rêxistina DEM Partî ya Anqara vernîya Wezaretê Perwerdeyî de eşkerayî daye ke tede endam û temsîlkarê dezgehanê demokratîkan û xeylê kesî ameyî pêser. Çalakîye de pankartê “Seba perwerdeyêko zanistî, bêpere û ziwanê dayîke budçe ” ameye akerdiş û dovîzê sey “Seba sermaye nê, seba perwerdeyî budçe” ameyî berzkerdiş.
‘Ganî MESEMî bêrê wedarnayiş’
Hemserekê DEM Partî yê Anqara Yilmaz Yildirimcî dîyar kerd ke înan budçeya ke bêpere nîya û ziwanê dayîke nêgêna binê ewlehîye qebul nêkerda û wina vat: “Wendoxan rê werdo bêpere heqêk o. Krîzê ekonomîk xizanîya gedeyan zêde keno û bi mîlyonan gedeyî heqê perwerdeyî ra mehrûm manenê. Binê nameyê MESEM’î de gedeyan kenê karker û rîyê bêkontrolîye ra heta nika 95 gedeyan ganê xo da. Ganî MESEM bêro wedarnayiş û budçe seba perwerdeyî bêra cîyakerdiş.”
‘Heqê ziwanê dayîke hîmê aştî yo’
Yildirimcî vist vîrî ke ganî heqê perwerdeyî yê bi kurdkî û heme ziwananê dayîke bêro naskerdene û dewam kerd: “Heqê ziwanê dayîke hîmê hemwelatîya hempar û aştî yo. Wezaretê Perwerdeyî sîyasetê yew ziwan, yew milet û yew bawerîye domneno. Pawitişê heqê ziwanê dayîke, pawitişê demokrasî û aştî yo.”
Yildirimcî waştişê partîya xo wina rêz kerdî:
- Ganî heme mekteban de heqê werdê bêpere bêro caardene û gedeyî biresê werd û awe ya pake.
- Ganî MESEMî bêrê wedarnayîş û gedeyî nêrê karkerkerdiş.
- Perwerdeyê bi kurdkî û heme ziwananê dayîke bibo û sîyasetê yewziwanîye biqedîyo.
- Ganî budçe seba sermaye û faîzî nê, seba perwerde û wendoxan bêra cîyakerdiş.
Eşkerayî bi vatişê sloganan qedîyaye.
