Têgêrayîşê Cinîyanê Azadan (TJA) û Dayîkê Aştî yê Êlihî, seba 25ê Teşrîna Peyêne Roja Têkoşînê ya Vera Şîdetê Cinîyan Ser o vernîya PTTyê Merkezî yê Êlihî de eşkerayî daye û mektub û qertê ke nuştbî, embazanê xo yê irewteyan ê cinîyan rê erşawitî.
Verê erşawitişê mektuban, vernîya bînaya PTT’yî de eşkerayî ameye dayene.
‘Azadîya înan azadîya ma ya’
Sabîha Ekîncî ya ke serê nameyê Dayîkanê Aştî qisey kerd, vat: “Ma do çarçewaya 25ê Teşrîna Peyêne de mektub û qertanê xo yê ke nuştî, embazanê xo yê zîndanan rê bierşawê. Ma wazenê ke serekê ma û temamê tepişteyan bêrê veradayene. Çira tepişteyê neweşî yê ke cezaya înan qedîyaya nênê veradayene? Lazim o ke seba nê tepişteyanê neweşan yew game bêro eştene. Ma heme embazanê xo yê zîndanan silam kenê û azadîya înan wazenê. Azadîya înan azadîya ma ya. Biciwîyê cinîyê zîndanan, cinî cuye azadî.”
Eşkerayî pê sloganê “Cinî Cuye Azadî” qedîyaye û dima zî mektubî ameyî erşawitene.
