TJA Bedlîs de dest bi çalakîyanê 25ê teşrîna peyêne kerd û da zanayene ke emser zî bi vateyê ‘Jin Jiyan Azadî’ û bi xoverdayîşê xo yê bihêybetî verê 25ê teşrîna peyêne ra şonê.
Têgêrayîşê Cinîyan ê Azadan (TJA) Bedlîs de dest bi çalakîyanê 25ê Teşrîna Peyêne, Roja Mîyanneteweyî ya Têkoşînê Vera Şîdetê Ser Cinîyan kerd. Cinîyan verê berê qezaya merkezî ya Bedlîsî de eşkerayîyêk da. Eşkerayî de cinîyan venga heme cinîyanê Bedlîsî da ke beşdarê çalakîyan bibê, vera şîdetî vengê xo berz bikerê û îradeyê xo yo azad bimojnê. Eşkerayî de pankartê “Ma do heyfê cinîyanê ke ma ra kêmî bîyî bigîrê” û “Jin jiyan azadî” ameyî akerdene. Aktîvîstanê TJA reyde temsîlkar û endamê sazgehanê sîvîl û partîyanê sîyasîyan zî beşdarê eşkerayî bîyî.
‘Ma do bi qerardarîyêka girdêre meydanan de bibê’
Metnê eşkerayî hetê aktîvîsta TJA’yî Nûrdan Îlbasane ra ame wendene. Nûrdan Îlbasane da zanayene ke têkilîya seypê, biedalet û pêameye ya mabênê cinî û camêrdî ke bi hezaran serran dewam kerd, goreyê menfeetê camêrdî û vera menfeetê cinîye ameye serûbinkerdene. Nûrdan Îlbasane ard ziwan ke sîstemo *camêrdperest* seba cinîyan kiştiş û hepis wazeno û wina vat: “La ma sey cinîyan emser zî bi vateyê ‘Jin Jiyan Azadî’ û bi xoverdayîşê xo yê *bihêybetî* verê 25ê Teşrîna Peyêne ra şonê. Ma do bi têkoşînê xo yê azadîye ke sebebê estbîyayîşê ma yo, her roja serre ra hîna bihêrs û bi qerardarîyêka girdêre meydanan de bibê.”
Eşkerayî bi sloganê “Jin jiyan azadî” qedîya.
