Wan – TJA’yî startê çalakî û programanê 25ê Teşrîna Peyêne verê Berê Sînorî yê Kapikoyî yê qezaya Serawî de da. TJA’yî da zanayîş ke ê do vera sîyasetêko ke heqê cuye yê cinîyan, îradeya înan a azade yan zî têkoşînê înan ê kolektîfî keno hedef, mil nêronê.
Têgêrayîşê Cinîyanê Azadan (TJA) startê çalakî û programanê ke do bi munasebetê 25ê Teşrîna Peyêne, Roja Mîyanneteweyî ya Têkoşînê Vera Şîdetê Cinîyan Ser o Wan de bêrê virazîyayene, bi eşkerayîyêke verê Berê Sînorî yê Kapikoyî yê qezaya Serawî de da. Eşkerayîye de pankartê “Bi hêz û îradeyê xo yo azad nika wextê cinîyan o” ame akerdene û sloganê “Jin, jiyan, azadî” û “Biciwîyo têkoşînê cinîyan” ameyî eştene. Parlamenterê DEM Partî Gulcan Kaçmaz Sayyîgîte û Oznûr Bartine, Dayîkê Aştîye, temsîlkarê rêxistinanê cinîyan û zaf cinîyan eşkerayîye de ca girewt.
Metnê eşkerayîye bi nameyê cinîyan hetê aktîvîsta TJA’yî Şehrenaz Gezîcî ra ame wendene.
Şehrenaz Gezîcî dîyar kerd ke vengo ke ê ewro Berê Sînorî yê Kapikoyî ra berz kenê, tena seba na mintiqa nîyo; no seba heme cinîyanê çar hetanê dinya yo ke seba azadî û seyyewbînîye têkoşîn kenê. Şehrenaz Gezîcî da zanayîş ke şîdet sînoran nas nêkeno, la piştîdayîşê cinîyan û têkoşînê înan ê seba azadîye zî bi sînoran nêno vindarnayene û wina vat: “Ma do vera tu sîyasetêko ke heqê cuye yê cinîyan, îradeya înan a azade yan zî têkoşînê înan ê kolektîfî keno hedef, mil nêronê. Bi saya hêzê xoserî, îradeya hemparîye û têkoşînê rêxistinkerdeyî yê cinîyan, ma do pîya cuyêka şîdet ra dûrî, seyyewbîne û azade awan bikerê.”
Eşkerayîye bi sloganê “Jin jiyan azadî” qedîyaye.
