Amed – Pîyê Rojîn Kabaîşe Nîzamettîn Kabaîşî, derheqê hêrişê ke birayê ey ser o ame kerdene de vat: “Ma doza Rojîne ra yew game zî peyser nêerzenê, heta ke doze tarîtî ra vejîyo, ma têkoşînê xo dewam kenê. Ma înan ra nêtersenê û ma qet doza xo ra fek veranêdanê.”
Unîversîteya Yuzuncu Yilî ya Wanî de 27ê êlule ya 2024î de wendekara beşê mamosteyî Rojîn Kabaîş vîndî bîye. Cenazeya Rojîn Kabaîşe 18 rojan ra pey qeraxê Gola Wanî de ame vînayene. A roje ra heta ewro keyeyê Rojîn Kabaîşe têkoşînê rastîye restene danê û zaf rayan maruzê tehdîdan û hêrişan manenê. 8ê teşrîna peyêne de zi hetê 4 kesanê ke rûyê înan girewte bî, hêrişê apê Rojîne Ahmet Kabaîşî kerd.
Nîzamettîn Kabaîşî, derheqê hêrişo ke birayê ey ser o amebî kerdene û pêvajoyê cipersayişî yê qetilkerdişê kêna xo Rojîn Kabaîşe de Ajansa Welat reyde qisey kerd. Nîzamettîn Kabaîşî dîyar kerd ke ê qet doza xo ra game peyser nêerzenê û rayedaran rê venga lezkerdişê edaletî da.
‘Birayê mi ame derbkerdene û tehdîtkerdene’
Nîzamettîn Kabaîşî dîyar kerd ke Stenbol de, herêma Buyukçekmece de, çend kesanê ke rûyê înan girewte bî, birayê ey ser o hêriş kerd û wina vat: “A roje, roja bazarî bî, birayê mi şîyêne servîs. Teber de verê ey girewt, hem derb kerd, hem zî tehdît kerd. Dima dima ci ra vat: ‘Dora birayê to Nîzamettîn Kabaîşî zî yena, ma ey rê zî wina kenê.’ Wa ey ma bikişê zî, tehdît zî bikerê; ma înan ra nêtersenê û ma qet doza xo ra fek veranêdanê.”
‘Yew serre ra vêşîyo ke ma yenê tehdît kerdene’
Nîzamettîn Kabaîşî ard ziwan ke qetilkerdişê Rojîn Kabaîşe û hêrişê ke keyeya înan ser o yenê kerdene, di serran ra vêşî dosya bêwayîr mend û gumanê înan est ê. Ey wina dewam kerd: “Yew serre ra vêşî ya, bi telefonan, bi fotografê guleyan û çekan keyeya ma yena tehdîtkerdene. Doz di serran ra vêşî ya tarîtî de menda. Dozgeran û rayedaran persanê ma rê cewabê zelalî nêdayî û no zî nîşaneyê nêbîyayîşê samîmîyetî yo. Bê guman nê kesî bi yew hawayî qatîlan reyde yenê têser, labelê heta ke dosya eşkera nêbo, kes nêşeno çîyêk teqez vajo.”
‘Wa dewlete wayîrê dosyaya Rojîne bivejîyo’
Nîzamettîn Kabaîşî vengdayîşê xo yê edaletî reyêk bîn kerd û wina vat: “Ez nê cayî de reyêk bîn dewletî rê veng dano; wa wayîrê dosyaya Rojîne bivejîyo. Ma nê di serrîyo ke nê êşî ancenê. Wezaretê Edaletî soz da ma ke sînyalanê telefonan û hezaran kesan ser o lêkolîn bikero, labelê kar zaf giran şîyeno. Rojîne teyna kêna ma nîya, kêna heme Tirkîya ya. Ez seba heme cinîyan û ciwanan edaletî wazeno.”
