Vizêr 4 kesanê rîpêştîyan hêrişê datê Rojîn Kabaîşe Ahmet Kabaîşî kerdbi. Hêrişkaran ey ra vatbi: “Ma Torosê sipî yê. Ma do to û birayê to zî bikişê û bierzê mîyanê torbeyanê zerdan. Kes nêşkeno şima xelas bikero.”
Wendekara Unîversîteya Van Yuzuncu Yil (YYU) Rojîn Kabaîşe 27ê êlule 2024î de vindî bîbî û 18 rojan ra pey cenazeya aye qeraxê Gola Wanî de amebî dîyene. Keyeyê Kabaîşî dest bi gêrayîşê edaletî kerdbî. Vizêr Îstanbul de 4 kesanê rîpêştîyan Ahmet Kabaîşî ser o hêriş kerdbî. Nê 4 kesan erebeya Ahmet Kabaîşî vindarnaye û ey rê îşkence kerd. Îşkence de Ahmet Kabaîşî ra vato: ‘Ma Torosê sipî yê, ma do to û birayê to zî bikişê û bierzê mîyanê torbeyanê zerdan.’ Goreyê agahîyan hêrişkaran ey ra vato ke şêro birayê xo rê vajo ke na dewa ra fek veradê û wina vato: “Ma Torosê sipî yê. Ma do to û birayê to zî bikişê û bierzê mîyanê torbeyanê zerdan. Ne Tayyîp Erdogan, ne Devlet Bahçelî ne zî kesêko bîn nêşkeno şima xelas bikero.”
Hêriş senî bi
Vizêr şewe wexto ke Ahmet Kabaîş kar ra vejîyayêne erebeyêk nêzdîyê erebeya ey bîye û kesêko ke cilê ey sîyayî bî û rîyê xo pêştbî, cehd kerd ke Ahmet Kabaîşî vindarno. Ahmet Kabaîş zî bi fikra ke ê polîs ê vindeno.
Wexto ke Ahmet Kabaîş erebe ra vejîyeno vîneno ke çar kesî yê, cilê sîyayî xo ra kerdê û rîyê înan pêşte yo. Destê di kesan de *debance*, destê di kesan de zî çekê girdî est ê.
Dima çar kesî Ahmet Kabaîşî ser o hêriş kenê. Înan ra yew bi çîyêk sereyê ey ro dano. Badê ke sereyê ey ro danê ey ra vanê: “Şo birayê xo rê vaje û na dewa ra fek verade. Ma Torosê sipî yê. Ma do to û birayê to zî bikişê û bierzê mîyanê torbeyanê zerdan. Ne Tayyîp Erdogan, ne Devlet Bahçelî ne zî kesêko bîn nêşkeno şima xelas bikero. Seba naye birayê xo rê vaje û dewa ra fek veradê.”
Îşkence ra pey Ahmet Kabaîşî ra vanê: “Sereyê xo berz meke, eke to berz kerd ma do to bikişê.” Dima erebeya Ahmet Kabaîşî gêrenê. Gêrayîşî ra pey reyna ey tehdîd kenê û cayê serebûdî ra remenê. Dima Ahmet Kabaîş kesanê ke rayîr ra vîyarenê ra ardim wazeno. La sebebê tesîrê hêrişî ra nêşkeno cayê serebûdî polîsan rê vajo. Polîsî bi rayîrê GPS’yî cayê Ahmet Kabaîşî tesbît kenê û ey benê nêweşxane.
Qerarêk çin o zî polîsan dosya avûkatan rê teslîm nêkerde. Vera naye avûkatan detayî girewtê .
