Amed – Rojnameger Azad Altayî derheqê hêrişanê vera çapemenîye de dîyar kerd ke ganî heme çapemenîya muxalîfe vera îqtîdarî vengê xo bikero yew. Azad Altayî ard ziwan ke bi piştîdayîş û reaksîyonêkê xurtî ê şênê vernîya nê tatbîqatan bigîrê.
Hêrişê îqtîdaran ê vera Çapemenîya Azade 36 serran o ke bê vindertiş dewam kenê. Îqtîdarî vurîyayî zî, şekl û amancê hêrişan nêvurîyayî. Nê 36 serran de desan rojnamegerî ameyî kiştene, tepiştene û surgunkerdene, bi desan rojname, kovar û keyepelî ameyî astengkerdene. Çiqas ke 2 serran ra zêdêr o Prosesê Aştîye û Komelo Demokratîk dewam keno zî, hêrişê vera Çapemenîya Azade dewam kenê.
‘Nêwazenê raştî vejîyo meydan, coka hêrişê çapemenîye kenê’
Rojnameger û Edîtorê Ajansa Mezopotamya Azad Altayî sebebê hêrişan sey astengkerdişê raştîye nirxna û wina vat: “Hêrişê vera çapemenîye tena demanê şerî de ney proseyanê aştîye de zî dewam kenê. Çiqas ke Têgêrayîşê Kurdan hende gamê şênberî eştî zî, îqtîdarê AKP’yî gamêka şênbere nêeşta. Wexto ke Çapemenîya Azade na raştî vejena meydan, hêrişî benê û wazenê raştî tarîtî de bimana.”
Azad Altayî dîyar kerd ke 1990an de hêrişî fîzîkî bîyî, sey kiştiş, tepiştiş û bombekerdişê Rojnameyê Ozgur Ulkeyî. Azad Altayî vat: “Ewro komel zafane bi medyaya dîjîtale reseno raştîye, coka demê AKP’yî de kiştişê medyaya dîjîtale dest pêkerd. Şeklê hêrişan vurîyayo, la amancê îqtîdaran nêvurîyayo.”
‘Îqtîdar seba bêvengîye hende hêriş keno’
Azad Altayî ard ziwan ke keyepelê Ajansa Mezopotamya 44 reyî ameyo astengkerdene û hesabê ajansî yê medyaya dîjîtale zî her aşme yew rey yenê qefelnayene. Azad Altayî vat: “Nê tatbîqatî pêro teberê huqûqî de yê. Tirkîya de her gamêka teberhuqûqîye kurdan ra dest pêkena; çi hêrişê vera sîyasetmedaran bo, çi tayînkerdişê qayûman bo, çi zî hêrişê vera çapemenîye bo. Reaksîyonê vera nê hêrişan zaf zeîf ê. Seba ke reaksîyonê xurtî nêameyê dayene, îqtîdarê AKP’yî ewro rehet hereket keno.”
Azad Altayî qalê xo wina qedênayî: “Vera nê hêrişan tena yew rayîr est o. Sansur û hêriş kamca ra bêro wa bêro, kamî ser o bibo wa bibo, ganî reaksîyonêko xurt bêro dayene. Ganî heme muxalîfê vera îqtîdarî vengê xo bikerê yew. Ma ganî reng, ziwan û neteweyê kesê ke hêriş ey ser o beno, nêvînê û piştîyêka xurte bidê ci. Tena bi piştîdayîş û reaksîyonêkê xurtî merdim şêno vernîya nê tatbîqatan bigîro.”
