Wezîrê Edeletî Akin Gurlek, Edlîya Çağlayanî de rojnamegeran reyde ameye pêser û derheqê cipersayenê ke rojdem de yê eşkerayîyî dayî.
Gurlekî va: “Dosyayê ke faîlê înan nêzanîyenê, reyna dest erzîyeno ser. Yewîya ke ameya awankerdene 4 aşmî yo ke xebetîyena; tede 40 dosyayê ke 46 maktulî estê, ameyî roştîkerdene. Aseno ke ti çîyêk hetanî peynîye tarîtî de nêmaneno, edelet çi wext bo zî tecelî keno.”
Dosyaya Gulistan Doku: Cayê cenazeyî îhtîmalo ke çend reyî ameyo vurnayene
Dersim de 5ê Çele 2020î ra nat keyneka zanîngehî Gulistan Doku ra xeberêk nêameya girewtene. Gurlekî derheqê dosyaya aye de wina va: “Dosyaya Gulistan Doku de averşîyena zaf muhîme ameye kerdene, la seba qedîyayişê cipersayene tenêna wext lazîm o. Peynî de îfadeyê Umut Altaşî zî ameye. Tîya de seba ma çîyo zaf muhîm cayê cenazeya Gulistan Doku tespît kerdena. Dosya de tayê beyanan de aseno ke cayo ke cenaze tede yo çend rey ameyo vurnayene. Reyna îhtîmalê bi dermananê kîmyasalan werte ra vedaritena cenazeyî zî est o. Seba ke keyeyê Gulistan Doku şêrê serê mezela kênaya xo de dua bikerê, no seba ma zaf muhîm o. Tîya de kes valî bo û yan zî makamê de bîn de bo, ferq nêkeno.”
Dosyaya Rojin Kabaîşe
Van de 27ê Êluna 2024î de wendekara zanîngehî Rojin Kabaişe bibî vîndî û 15ê teşrîna verêna 2024î de cenazeya aye Golê Vanî de amebî vînayene. Gurlekî derheqê soruşturmaya aye de zî qisey kerd û vat: “Telefonê aye yê destî ser o tayê çîyê ke zelal nêbîyê est ê. Cipersayîşê DNAyî ameyî kerdene. Telefonî ser o zî cipersayîşê teknîkî dewam kênê. Labelê nîka reyna zî destê ma de çîyêko asaye yo ke ma vajim est o, çin o.”
