Ali Kahramanî ke tehqîqatê Gulistan Doku de ame tepiştene, vat ke rayîrî ser o 176 kamerayî est bîyî û “tu nuqtaya merdîye” çin bîye. La wexto ke dîmenê Sarı Saltukî ameyî persayene, vat: “Beno ke ez xelet bîya.”
Gulistane Doku 5ê çeleyê 2020î de Dêrsim de vindî bîye û a roje ra nat aye ra xebere nêameye girewtene. Bi xorînkerdişê tehqîqatî îdîayê ke Doku ameya qetilkerdene û dima bi nawitişê “întîharî” delîlî ameyî nimitene, kewtî dosya. Bi operasyonanê peyênan hûmara tepişteyanê dosya bîye 32.
Mîyanê tepişteyan de Hetkarê Fermandarê Cendirmeyanê Wîlayetê Dêrsimî yo verên Ali Kahraman û cinîya ey Burçin Hizli Kahraman zî est ê; ê bi sûcanê “çinkerdiş, nimitiş yan vurnayîşê delîlanê sûcî, kesî ra azadîya ci girewtiş û ardimkerdişê kiştişê bi qesdî” ameyî tepiştene. Goreyê tesbîtanê dozgerîye, wesayîta keyeyê Kahramanî saetanê ke Doku tede vindî bîye, cayê serebûdî ra vîyarta û nêzdîyê di deqîqeyî badê serebûdî cinîya Tuncay Sonelî Handane Sonel reyde telefon de qisey bîyo.
Kahramanî îfadeyê xo de vat ke Tuncay Sonel eşkeno qoricîyan ser o tehakum bikero û înan manîpule bikero û lajê ey zî tim hêzê pîyê xo şuxulnayêne, bi kincê pawitoxan û çekdar gêrayêne. Ey ard ziwan ke demê wezîfeyê ey de rayîrê Dêrsim-Xarpêtî ser o nêzdîyê 176 kamerayî est bîyî û tu nuqtaya nimita çin bîye, kamerayî 24 saetî ameyêne taqîbkerdene û qeydî 1-3 aşmî ameyêne arşîvkerdene. La derheqê tesbîtê dozgerîye de ke dormeyê Vîyadukê Sari Saltukî de dîmenê kamera nêameyî dîyene, ey beyanêko cîya da: “Beno ke ez a herême de xelet bîya. La goreyê fikrê mi Vîyadukê Sari Saltukî de zî ganî bi qetî kamera bibo; tîya dekewtişo tekane yê bajarî yo. Ez zana ke heta temmuza 2019î ke ez şîya, nê kamerayî çalak bîyî.”
Goreyê dozgerîye, 5ê çeleyê 2020î saete 12.25 de pirdê Sari Saltukî ser o wesayîtêk ameye dîyene; wesayîta keyeyê Kahramanî 12.25.12 de PTSyê FEDAŞî ra û 12.28.58 de PTSyê Unîversîte ra vîyarta û goreyê hesabî nêzdîyê saete 12.27 de dormeyê pirdî ra vîyarta. Xeta telefonî ke Ali Kahramanî şuxulnayêne, 12.27.51 de hûmara Handane Sonel geyraye û dima telefon de qisey bî. Kahramanî îdîa kerd ke nê qiseykerdişî de derheqê Doku de tu çî nêameyo vatene, “bi temamî qiseykerdişê cinîyan bî” û pawitişê Tuncay Sonelî yê derheqê tesbîtê sînyalê SIM karta Doku de ey rê zî bawerker nîyo.
Dozgerîye bi datayanê bazî yê telefonê Şukru Erogluyî ke eynî şewe demêko derg padaye bî û hereketanê Fatih Ozmenî resa qenaetê huqûqî ke badê kiştişê Gulistane Doku cenazeya aye hetê Şukru Eroglu û Fatih Ozmenî ra nêzdîyê mezelê Koçpinarî de ameya definkerdene.
