Fermandarîya Qerargehê Merkezî yê YJA Star’î bi munasebetê serrgêra şehadetê Şehîd Bêrîtane vat: “Her endama têkoşînê azadîya cinîye ke rayîrşîyayîşê xo de manîfestoyê têkoşînê Şehîd Bêrîtane esas gêna, na îdia de ya ke bibo wayîra rêça nê mîrasî û pratîk de zî bîyaro ca.”
Fermandarîya Qerargehê Merkezî yê YJA Star’î bi munasebetê serrgêra şehadetê Bêrîtane (Gulnaz Karataş), ke pêşenganê têkoşînê azadîya cinîyanê Kurdîstanî ra yew a, eşkerayîyêk daye. Eşkerayîye wina ya:
“Bêrîtan heqîqetê bedenî û nasnameyî yê cinîya ke xo kerda artêş û azad bîya, ya. Têkoşînê azadîya kurdan de Bêrîtan heqîqetê yewbîyayeyî yê cinîyanê têkoşînê azadîya kurdan û helwesta înan a vera teslîmîyetî temsîl kena.
Ruhê xoverdayîşî yê Beseyan û cinîyanê ke qirkerdişê Dêrsimî de vera teslîmîyetî xo ver da û xo kerran ra eşt, şexsê Bêrîtane de reyna ganî bî. No çî domdarîya xeta xoverdayîşî ya. Beseyan Bêrîtane de mana dîye û ruhê xoverdayîşî têkoşîn de newe bî.
Bêrîtane 1992 de şerê vera hemkarîya kurdanê kevneperestan de vera teslîmîyetî xo ver da. Aye heqîqetê cinîya ke xo kerre ra erzena û xeta cinîya ke şer kena, mojnaye. Sey cinîyêk bi çalakîya xo ya vera hemkarî û xayînîye, ewro zemînê yewîya şarê kurdan awan kerdo.
Kesayet û têkoşînê xo de bi zanayîşê îdeolojîkî helwestêka xurte afirnaye û bi stratejî û taktîkî fermandarîye de bîye pispore. Krîter û xeta cinîya ke derbazê çalakîye bena û şer kena, mojnaye. Bi vatişê ‘Şer bike vila mi; bi şerkerdiş ma azad benê, bi azadbîyayîş rindek benê û wexto ke ma rindek bibê, ma do bêrê heskerdiş’ xeta têkoşînî mojnaye. Bi helwest û çalakîya xo têkoşînê azadîya cinîye rê pêşengîye kerde. Bi çalakîya xo reyna mojna ke artêşbîyayîş tena têkoşînêko çekdarî nîyo; eynî wextî de helwest û heqîqetê zanayîşî wazeno. Estetîkê şerî, exlaqê xoverdayîşî û krîterê heskerdişî, bi rayîrşîyayîşê xo kerdî manîfestoyêk. Bêrîtane cuye û têkoşînê xo tarîxî de neqş kerdo. Estbîyayîşê cinîye ke waştêne tarîx de û bêvengîya kerran de bêro nimitiş, kerran ra qîrnaye û nê kerran de qîrayîşê xoverdayîşê cinîye reyna resna heme cinîyan. Bi vatişê ‘Şoriş kesayetêkê bahozî wazeno’, her fîşeka xo ya vera hemkarîye û tradîsyonê kevneperestî de, heme zincîranê koleyîye yê şikiteyan de xo newe ra afirnaye û bi şîîre heqîqetê xoverdayîşê cinîye mojna.
Bêrîtane têkoşînê xo reyde tena manîfestoyê dewreyê xo nênuşto; eynî wextî de bi nuşteyanê xo Beseyan ke mîrasê înan dewr girewto, mana kerdê û peyrewanê xo rê sey mîras fehmê fermandarîye yê heqîqetê şerî û cesaretî verdayo ke tarîxê azadîya cinîyan yo ke nêameyo nuştiş, newe ra binusnê. Ewro sey YJA Star’î, ma wayîrê rêça xeta têkoşîn û heqîqetê fermandarîye yê rêxistinkerdeyî yê Şehîd Bêrîtane yê. Her endama têkoşînê azadîya cinîyan ke rayîrşîyayîşê xo de manîfestoyê têkoşînê Şehîd Bêrîtane esas gêna, na îdîa de ya ke bibo wayîra rêça nê mîrasî û aye bîyaro ca. No têkoşîn û kulturê xoverdayîşî mîyanê heqîqetê şerî de bi seyan Bêrîtanî afirnayê; mîras gird bîyo û resayo ameyoxî. Heqîqetê Bêrîtane mîyanê şerê ke serran o koyan û şaristanan de yeno ramitiş de çiqil dayo û gird bîyo; şexsê Şehîd Axîn Cûdî, Şehîd Sema û bi seyan mîlîtananê azadîye yê cinî û camêrdan de zêde bîyo.
Rayberîya ma dîyar kerda ke cewabo tewr gird ke şehîdan rê bêro dayîş, girdkerdişê têkoşînî û xoafirnayîşê heqîqetê şehîdan reyde yo. Ser naye, seba averberdişê aktîfbîyayîşê xoverdayîşî ke şexsê Şehîd Bêrîtane de aver şîyo û seba cewabdayîşê mîrasê şehîdan, 1ê teşrîna peyêna 1993î de artêşbîyayîşê cinîyan îlan kerdo. Ma sey YJA Star’î, ke wayîr û mîrasgirê xeta Şehîd Bêrîtane ya, dîyar kenê ke ma do têkoşînê azadîya cinîyan heme warê cuye û heme deqîqeyanê şerî de biresnê heqîqetî.”
