Komîsyonê seba Rojîn Kabaîşe Edalet, raporê têkoşînê xo yê di serran seba raya pêroyî pare kerd. Komîsyonê seba Rojîn Kabaîş Edalet wexto ke ver bi serrgêra 2. a kişîyayîşê Rojîn Kabaîş şino, roparê xo Komeleya Kulturî ya Dîvrîgî de eşkera kerd. Salona ke kombîyayîşê çapemenîye tede virazîya pankartê bi nuşteyê “Ma do seba Rojîn Kabaîşe edaletêko rast bîyarê ca, ma do mergê cinîyanê gumanbaran roşn bikerê” ame daliqnayene.
Hîvda Selene, bi nameyê komîsyonî, rapor pêşkêş kerd. Hîvda Selen, qiseykerdişê xo de prosesê amadekerdişê raporî ser o vinderte û wina vat: “Dosyaya Rojîn Kabaîşe de detayê neweyî vejîyayê meydan. Detayêke ewro vejîyayê meydan problemêko pîlo. Bi erşawitişê telefonî seba teberê welatî de ame dîyarkerdene ke tîya de amanc sey vindîkerdişê delîlan yeno vînayene. Seba ke telefon marqaya Çînî yo vanê tîya de anêbeno erşawito Çîn û amanc zî çinkerdişê delîlan o.
Ma waşt nê çîyan rapor bikerê, seba ke hem vîrê komelî de hem zî vîrê cinîyan de ca bigîrî. No semed ra, ma bi hawayêko şênber eşkera kerd ke ma nê çîyan xo vîr ra nêkenê û nêdanê vîr ra kerdene.”
