Amed – Weşanxaneya Belkî 6 kitabê neweyî weşanayî û vila kerdî. Nê şeş kitabî nika verê destê wendoxan de yê. Kitabî şîîr, cigêrayîş, sînema û hîkayeyanê kilman ra yenê meydan.
Refanê kitabanê kurdkî rê şeş kitabê bînî zî ameyî zêdekerdiş. Weşanxaneya Belkî ya Amedî 6 kitabê neweyî weşanayî. Nê şeş kitabî yê nuştoxanê cîyayan ê û şîîr, cigêrayîş, hîkaye û cigêrayîşê sînema ra yenê meydan.
Cengîz Mamoyî kitabê “Mem û Zîna Xanî di Hawarê de” cigêrayo û nuşto. Hamîd Ersoz Xwezî kitabê şîîran “Stara Stêrkê” nuşto. Erdal Kuzuyî kitabê hîkayeyanê kilman “Şop” nuşto. Sînemager Ardîn Dîrenî kitabê “Vî zemanî her kes mîmarê sînemaya xwe ye” hedre kerdo. Ayşegul Kizilkayaye zî kitabê hîkayeyanê kilman “Jin ji hezkirina mêran hez dikin” nuşto. Sewbîna kitabê “Amûda Bavê Min (Mehmûdname)” ke şîîranê Ehmed Huseynîyî ra yeno meydan, ameyo weşanayîş. Weşanxaneya Belkî vejîyayîşê nê kitaban hesabanê xo yê medyaya dîjîtale de vila kerdo.
‘Mem û Zîna Xanî di Hawarê de’
Seba kitabê “Mem û Zîna Xanî di Hawarê de” wina ame vatiş: “Amancê na xebate no bî ke eserêko neteweyî û kovarêka mîllî pîya bêrê erjnayîş. Kovara Hawarî hem rehmê kurdan a hem zî arşîvê kurdan a; beno ke arkeolojîya kurdan bi xo ya. Na cigêrayîşe nê her di qerase ardî têhet û pîya rêz kerdî. Raştîye de eke eserê Ehmedê Xanî ‘Mem û Zîn’ û kovara ‘Hawar’ yew bedena kurdîtîye bo, o bîn zî ruhê aye yo. Bi na xebate ma bedene û ruhê kurdîtîye şexsê eserê ‘Mem û Zîn’ û kovara ‘Hawar’ de ardî têhet. Ez bawer kena ke na cigêrayîşe de hem ‘Mem û Zîn’ hem zî kovara ‘Hawar’ hetê mîllîbîyayîş û neteweyîye ra tamê kurdîtîye bes xo mîyan de gênê.”
‘Şop’
Seba kitabê Erdal Kuzuyî “Şop” wina ame dîyarkerdiş: “Binê dare ra tozêka girde berz bîye. Domanêk dare ra panc gamî dûrî kewtbî û qîrayêne. Yewê înan binê dare de fek ser kewtbî û xarê ey cêba ey ra rijîyabî, dorûverê ey de vila bîbî. Vizvizê mêşanê ser qilêrî ameyêne û kutikê ke sîya de dergê xo bîbî, werişte bî û lewayêne. Tayê merdiman serê xo pencereyan ra vetbî û cayê hedîseyî ra ewnîyayêne; camêrdêk bi fanêre û bêcemê xo, bi lingê birêsî ver bi dara tuye remayêne; merdimê taxe ver bi dare şîyêne. Vengê kornayanê erebeyan yewbînan ser o ameyêne û peynîya taxe ra vengê etarî ameyêne, vatêne: ‘Bêrê legenan!… Bêrê meteran!… Bêrê misînan!…’”
‘Vî zemanî her kes mîmarê sînemaya xwe ye’
Seba kitabê Ardîn Dîrenî “Vî zemanî her kes mîmarê sînemaya xwe ye” wina ame dîyarkerdiş: “Rind yan xirab, ewro merdim eşkeno behsê sînemaya kurdan bikero û kurdî zî sey heme netewe û komelanê bînan ê dinya sînema reyde meşgul ê. Heta nika nê warî de zaf eserê bierjî vejîyayî meydan. Seba sînemaya kurdan merdim eşkeno bi seyan fîlmê kilmî, belgefîlm û fîlmê dergî bimojno. Bi heme qelsî û kêmanîyanê xo sînemayêk est a ke merdim ser o qisey û munaqeşe bikero. La ma do nê munaqeşeyan koti û senî bikerê? Ma do nê fîlman koti û senî temaşe bikerê? Helbet seba ke merdim bieşko nê fîlman temaşe bikero û munaqeşeyan aver bero, hewcedarîye bi qadanê cîya-cîyayan est a. Merdim eşkeno vajo ke nê qadan ra ya tewr muhîme festîvalê fîlman ê.”
‘Jin ji hezkirina mêran hez dikin’
Seba kitabê hîkayeyanê kilman ê Ayşegul Kizilkaya “Jin ji hezkirina mêran hez dikin” wina ame vatiş: “Ez hende ver bi dojehe şîyêne ke çimanê mi tu çî nêdîyêne. O wext dêwanê dorûverê mi zî mencela ke ez do tede ronişta, rind weş kerdbî. Mencele hema zî qilêr nêgirewtbî; bi adirê zerrîya mi berq dayêne. Qeresayan mi rê vat ‘metersê, eke mencele sîya bibo zî tu çî nêbeno, do bibo çimşînka to. Ma do na qilêrî eniya to ra bidê ke ti çimbiyayî nêbî’. Belê, hema wina vat. La helbet wina nêqewimî; çimşînke koti, pawitiş koti! Ez kewta sîyabînîyêka bêserûbere. Mi kuçikê xo bi zerrîya xo kerdbî; adirê binê mencele mi bi xo veşnayêne. Tayê rey mi Homayî ra lawe kerdêne la Homa ke qedrê qeresayan girewtêne, kenarê mencela ke ma tede vindertbî de, temaşeyê mi kerdêne.”
‘Amûda Bavê Min’ û ‘Stara Stêrkê’
Kitabê Ehmed Huseynîyî yê “Amûda Bavê Min” û kitabê Hamîd Ersoz Xwezî yê “Stara Stêrkê” ra zî tayê rêzê şîîran ameyî vilakerdiş.
