Baroyê Wanî û Merkezê Heqanê Cinîyan ê Baroyî derheqê mergê biguman ê Rojîn Kabaîş de eşkerayîyêk daye û dîyar kerd ke raporê ATK’yî de leşa Rojîn Kabaîş ser o DNA’yê di camêrdanê cîyayan ameyo tespîtkerdene. Baroyî seba tespîtkerdişê sebebê mergî aye waştişê akerdişê gorê Rojîn Kabaîş kerd.
Komîsyonê Taqîbkerdişê Dewaya Rojîn Kabaîş ke hetê Baroyê Wanî, Merkezê Heqanê Cinîyan ê Baroyî, Şubeyê OHD’yî yê Wanî, Komeleya Cinîyan a Starî û ÎHAMED’î ra ameyo awankerdene, derheqê mergê biguman ê wendekara unîversîte Rojîn Kabaîş ke 27ê êlula 2024î de vîndî bîbî û 15ê teşrîna verêne 2024î de leşa aye vernîya Gola Wanî de amebi vînayene, eşkerayîyêk daye. Baroyî agahîyê peyênî yê dosyaya cipersayîşî raya pêroyî reyde pare kerdî.
‘Cehd kerd ke dosya bi manayê ‘întîharî’ padê’
Eşkerayî hetê Cagira Sereka Baroyê Wanî avûkat Jîyan Ozkaplan ra ameye wendene. Eşkerayîya Baroyî de ame dîyar kerdene ke rojanê verênan de tehqîqat tena serê îhtîmalê ‘întîharî’ ameyo rayraberdene û mintiqayêka teng de cigêrayîş ameyê kerdene û nê çîyî vatî: “Bi cehdanê baroyî dozgerêko 2. seba dosya ameyo wezîfedarkerdene û tehqîqat ver bi îhtîmalanê bînan ê bigumanan ra ameyo hîrakerdene.”
Leşa Rojîn de DNA’yê di camêrdan ameyo vînayene
Baroyî bale ante raporê Sazgehê Tibê Edlî yê Stenbol (ATK) û madeyê muhîman ê raporî ser o û wina vat: “Raporê ATK’yî de, serê asteyê sîngî (sternum) û herêma întravajînal a Rojîn Kabaîş de profîlê DNA’yî yê di camêrdanê cîyayan ameyo tespîtkerdiş. Naye ser o ma waşt ke îhtîmalê ‘bulaşî’ bi ser o metodê zanistî reyde cigêrayîş bêro kerdiş. Sewbîna ma waşt ke nimûneyê DNA’yî ke xebatkaran leşa aye ra girewto, wezîfedarê otopsî, cerdevanê taybetî yê unîversîte û heme xebatkarê camêrdî yê wargehê KHK’yî ke o wext wezîfedar bîyê, bêrê girewtiş û.” Baroyî dîyar kerd ke rîyê ereyvistişê raporan û yewbînannêgirewtişê eşkerayîyanê serdozgerîye yê herêmanê DNA’yî ser o, înan vera berpirsîyaranê ATK’yî bi manayê ‘nimitişê delîlan’ muracatê sucî kerd.
‘Pişkanê aye de awe çin a la vanê mîyanê awe de xeniqîyaya’
Eşkerayî de derheqê raporanê sebebê mergê Rojîn Kabaîş ser o agahîyê balkêşî ameyî parekerdene: “Her çend pişkanê Rojîn Kabaîş de awe nêameyba vînayene zî, sebebê mergê aye sey ‘mîyanê awe de xeniqîyayîş’ ameyo qeydkerdene. Naye ser oma waşt ke akerdişê gorî tede heme metodî bêrê şuxulnayene û ‘Testê Dîatomî’ bêro kerdene ke bi hawayêko teqez dîyar bibo ke awa ke aye tede nefes girewto awa gola Wanî ya ney.”
Kêmaneyê îdarî û ewleyî
Baroyî dewamê eşkerayî de dîyar kerd ke şîfreya telefonê Rojîn Kabaîş hema zî nêameya akerdene û seba nê waştişê hetkarîya teknolojîk ê mîyanneteweyî kerd. Sewbîna ame eşkerakerdene ke seba kêmaneyîya ewleyî ya mîyanê kampusî de û erey haydarkerdişê keyeyî, muracatanê înan ê vera Rektorîya Unîversteya Yuzuncu Yilî ya Wanî û rayberîya wargehî tehqîqatêko îdarî ameyo destpêkerdene.
‘Ma do nêverdê ke serê dewa bêro girewtene’
Baroya Wanî eşkerayîya xo wina temam kerd: “Zêdebîyayîşê merganê bigumanan ê cinîyan û cînayetanê Tirkîya, ma mecbur keno ke ma nê prosesan bi hawayêko çalak taqîb bikerê. Sey Baroyê Wanî û Merkezê Heqanê Cinîyan, ma do vera polîtîkayanê bêcezamendiş de têkoşînê xo yê huqûqî yê seba Rojîn û heme cinîyan heta peynî bidomnê.”
