Mardîn – Dêrik de dayîkê emrgirdî emrê xo ra nêewnîyenê, qeleme gênê dest û xebitîyenê ke wendiş û nuştişê kurdkî bimusê.
Kurdîstan de bi mîlyonan kurdî nêeşkenê heqê perwerdeyî yê ziwanê dayîke bixebitnê. Domanan ra teber kesê emrgirdî zî heqê perwerdeyî ra bêpar mendî. Bitaybetî dayîkê kurdî hem bi ziwanê xo hem zî bi ziwanêko bîn nêeşkenê biwanê û binusê.
Hazîme Ozcane û Adîle Ecere nê dayîkan ra yê. Ê Dêrik de ciwîyenê û çunke domanîya xo de nêşîyî mekteb wendiş û nuştiş nêzanenê. Dayîkan hewteyêk verê cû Merkezê Cuye û Piştîpêdayîşê Cinîyan ê Pelşîne yê Şaredarîya Dêrikî de dest bi kursê kurdkî kerdo. Înan verê cû qeleme girewte dest, dima bi xêzan dewam kerdo û nika resayê musayîşê herfanê kurdkî.
‘Wa heme dayîkî wendiş û nuştiş bimusê’
Hazîme Ozcane vat: “Ziwanê ma çin o, ma çîyêk nêzanenê. Ez ameya tîya ke bimusa. Ez wazena her kes bêro tîya û ziwanê xo bimuso. Kesê ke sey mi wendiş û nuştiş nêzanenê wa ê zî bêrê û wayîrê ziwanê xo bivejîyê.”
‘Wa dayîkî rastê astengan nêbê’
Adîle Ecere da zanayene ke seba ke wendiş û nuştiş nêzanena gama ke şina dezgehan zaf zehmetî ancena û vat: “Ez qet nêşîya mekteb. Gama ke ma şinê dezgehêkê fermî ez rastê probleman yena. Ganî heme cinîyê ke wendiş û nuştiş nêzanenê bêrê perwerde bivînê ke rastê astengan nêbê.”
