Wan – Şaredarîya Rêya Armûşî ya Wanî seba ke bale bianca nêweşîyanê cinîyan ser o, perwerdeyêk da. Perwerde de ame dîyarkerdiş ke teşhîso verên cuye xelasneno.
Wextê ma de nêweşîyê cinîyan, taybetî kanserê çijeyî û nêweşîyê rehmî, her ke şonê zêde benê. Şaredarî seba balantişê nê nêweşîyan û haydarkerdişê komelî ser o xebatanê perwerdeyî ramena. Çarçewaya naye de Şaredarîya Rêya Armûşî ya Wanî seba cinîyan programêko perwerdeyî viraşt. Program de doktor û pisporanê weşîye derheqê nîşaneyanê nêweşîyan, rayîranê pawitişî û muhîmîya kontrolanê rûtînan de tewrbîyayoxan rê agahîyê muhîmî dayî.
Mudira Sîyasetanê Cinîyan a Şaredarîya Rêya Armûşî Saadet Temele derheqê xebat û perwerdeyanê ke virazenê de agahî daye û wina vat: “Amancê ma yo bingeyên no yo ke ma cinîyan derheqê kanserê çijeyî de hişyar bikerê, bale biancê muhîmîya teşhîso verên ser o û derheqê muracatkerdişê xizmetanê weşîye de fehmêk awan bikerê.”
‘Do xebatanê xo bi ziwanê dayîke bikerê’
Saadet Temele dîyar kerd ke do perwerdeyanê xo bi ziwanê dayîke bidê û wina vat: “Ma wazenê perwerdeyan hîra bikerê û xo biresnê cinîyanê dewan û taxanê dûrîyan zî. Ameyox de ma plan kenê ke bi kurdkî perwerdeyan bidê. Amancê ma no yo ke xo biresnê heme cinîyan.”
‘Ma muhîmîye danê teşhîso verên yê nêweşîyanê cinîyan’
Perwerdekara Merkezê Sporî yê Cinîyan a Şaredarîya Rêya Armûşî Ebru Şene zî qiseykerdişê xo de bale ante muhîmîya perwerdeyî ser o û wina vat: “Ewro merkezê xo yê sporî yê cinîyan de bi amancê awankerdişê hişyarîye derheqê kanserê çijeyî û kanserê fekê rehmî de, ma semînerêk da. Sey merkezanê sporî yê cinîyan, ma tena seba averşîyayîşê înan yê fîzîkî ney, eynî wextî de seba ke derheqê weşîya xo de hişyar bibê zî nê xebatan rê muhîmîye danê. Taybetî ma wazenê bale biancê muhîmîya teşhîso verên ser o; wa cinî nê babetî de hişyar bê û muhîmîya kontrolanê weşîye yê biserûberan bizanê.”
‘Waştiş domnayîşê perwerdeyanê winasîyano’
Cinîyan ke tewrê perwerdeyî bîyî zî ard ziwan ke na xebate înan rê zaf bifeyde bîye. Înan bale ante na ser o ke kanserî de “teşhîso verên cuye xelasneno” û waşt ke xebatê winasî dewam bikerê.
