Bostanê Şaristanî yê Komunê Cinîyan ê Şaredarîya Amedî ya Şaristanê Girdî de berhemanê hamnanî ra dima dewreyê ronayîşê zimistanî dest pêkerd. 14 cinîyan ke warêkê 18 donimî de berhem danê, sewzeyanê ke do bêrê ramitiş ra heta xebitnayîşê warî heme qerarî pîya girewtî û şitilê zimistanî ronayî.
Xebatê Bostanê Şaristanî yê Komunê Cinîyan ke Serekîya Daîreya Polîtîkayanê Cinîyan û Serekîya Daîreya Xizmetanê Dewan pîya ramenê, warê Serekîya Daîreya Xizmetanê Dewan de dewam kenê ke Talaytepe de yo. Cinîyanê ke hamnan de warêkê 18 donimî de berhemê hamnanî ramitbî, miqateyê înan bîbî û arê dabî, goreyê waştişê xo seba dewreyê zimistanî reyna ameyî têhet.
Şitilê sewzeyan ke Serekîya Daîreya Xizmetanê Dewan seba pawitişê toximanê herêmkîyan amade kerdbî, bostanî de ameyî ronayîş. Kelemo sipî, xas, brokolî, qarnabehar, silq, tur, îspenax, pancaro sûr û pîyazo hurdî ameyî ramitiş. Sereka Daîreya Polîtîkayanê Cinîyan Ozden Gurbuz Sumere zî cinîyan reyde beşdarê ronayîşî bîye.
Sumere vat ke 14 cinîyan grûbêka berhemdayîşî ronaye û zaf babetan de qerarî hetê cinîyan ra pîya yenê girewtiş. Sumere ard ziwan ke şaredarî piştîdayîşê teknîkî, malzeme û şitilan dana û wina vat: “Kesê ke keda tewr zêde danê, berheman ronenê, gird kenê û miqateyê înan benê, embazê ma yê cinî yê. Coka seba ma zaf muhîm o ke ê mekanîzmayanê qerargirewtişî de bibê.” Sumere îfade kerd ke cinîyan rê derheqê toxim, herre û nebatan de perwerdeyî ameyî dayîş û derheqê cinsîyetê komelkî, piştîdayîş û şîdetî de zî xebatê hişyarî ameyî kerdiş.
Berhemanê hamnanî ra yew qism keyeyan de ame xebitnayîş, yew qism seba turşî û amadekarîyanê zimistanî ame xebitnayîş, yew qism zî dormeyê cinîyan de ame rotiş. Sumere vat ke Tesîsê Sosyalî yê Hamravatî de ke nêzdî de do bêro akerdiş, berhemê grûbanê berhemdayîşî yê cinîyan do bêrê mojnayîş û rotiş.
Berpirsyara Bostanê Şaristanî yê Komunê Cinîyan Gulistan Filiz vat ke nêzdîyê çar aşm û nêm o ke cinîyan reyde berhem danê: “Warêko komunal ame awankerdiş ke tede cinî cuya komunale yewbînan rê musnenê.” Cinîyanê berhemdayoxan ra Melek Acemoglu zî wina vat: “Wexto ke ma ameyêne tîya û miqateyê berheman bîyêne, ma tayê betilîyayêne. La wexto ke ma berheman benê keye û ronanê sifreyê xo ser, ma betilîyayîşê xo xo vîr ra kenê. Hem madî hem manewî, tîya zaf rind ame ma cinîyan rê.”
