Hemserekê DBP’yî yê Amedî Ahmet Dogan û Hemserekê MED-TUHAD FED’î Kerem Canpolatî komployê 9ê teşrîna verêne şermezar kerd û vengdayîşê beşdarbîyayîşê rayîrşîyayîşî kerd ke 9ê teşrîna verêne de Amed de do bêro kerdene.
Platformê Dezgehanê Demokratîkan ê Amedî seba Komployê Mîyanneteweyî yê ke 9ê teşrîna verêne ya 1998î de vera Rayberê Şarê Kurdan Abdullah Ocalanî dest pêkerd, do 9ê teşrîna verêne de bi şîarê “Seba statu, aştî û azadîye, azadî Birêz Ocalanî rê” rayîrşîyayîşêk bikero. Rayîrşîyayîş do verê awanîya Ncity ya qezaya Rezanî ra dest pêbikero û heta verê AZC Plaza ya Ofîsî dewam bikero.
“Ganî ma sey laserî beşdarê rayîrşîyayîşî bibê”
Ahmet Doganî dîyar kerd ke komplo tena vera Rayberê Şarê Kurdan ney, vera heme şaranê Rojhelatê Mîyanênî ame kerdene: “Komployê vera Rayber Apoyî bi têkoşînê şarê kurdan û dostanê ci puç bî. La seba ke no komplo bi temamî biqedîyo, ganî ma dorûverê Rayber Apoyî de bibê xelekêka adirî. Seba ke ma mesajêk bidê heme hêzanê hegemonan û dinya, ganî ma roja îneyi sey laserî bi girseyî beşdarê rayîrşîyayîşî bibê.”
“Bi têkoşîn û felsefeya Birêz Ocalanî no komplo puç bî”
Kerem Canpolatî vat ke armancê komployî qedênayîşê veng û rengê şarê kurdan û hêvîya şaranê Rojhelatê Mîyanênî bî: “Çîyo ke dagirkeran waşt, nêbî; bi têkoşîn û felsefeya Birêz Ocalanî no komplo puç bî. Ma wazenê ke şarê Amedî bi seyan hezaran kuçeyan de rayîr şêro û piştî bido aştîya ke bi pêşengîya Birêz Ocalanî ramîyena.”
