XARPÊT – Koyê Gorse de ke mîyanê qezaya Pîran a Amedî û qezaya Mîyaran a Xarpêtî de yo, daristan bi destê dewlete yeno birnayene.
Dorûverê Koyê Gorse de ke mîyanê dewa Pîrejman a qezaya Pîran a Amedî û dewa Nerbîş a qezaya Mîyaran (Arıcak) a Xarpêtî de yo, darî hetê Mudirîya Daristanan a Xarpêtî ra yenê birnayene û daristan yeno talankerdene.
Mudirîya Daristanan a Xarpêtî seba birnayîşê daristananê herême ke verê dewa Nerbîşî de, mîyanê Koyê Gorse de yê, 15ê tebaxe de îhaleyêk kerda. Çarçewaya netîceya nê îhaleyî de zî 14ê êlule de herême de birnayîşê daran dest pêkerd û daristan yeno talankerdene. Mudirîya Daristanan a Xarpêtî wexto ke îhale kerde, akerdişê rayîrê ke şino mîyanê daristanî zî girewt xo ser û şîrketa ke îhale girewta rê heta mîyanê Koyê Gorse yê Qijî rayîr akerd.
Berpirsîyarî seba talanî îzin danê ke leşkerî nobete bigîrê
Wexto ke ma Amed ra ver bi herêma ke tede daristan yeno birnayene şîyî, ma dî ke rayîr ser o zaf nuqteyê gêrayîşî est ê. Bi taybetî herême de ke kesê daristanî birnenê konî akerdê, no kar bin kontrolê leşkeran de yeno kerdene. Wexto ke ma nêzdîyê konanê kesan bîyî ke daristanî talan kenê, ma dî ke dorûverê konan de 2 wesayîtê sîvîlî vinderteyê; dima ma çimeyan ra musa ke nê wesayîtî yê leşkeran ê. No nawneno ke talan bi destê Mudirîya Daristanan a Xarpêtî û bin çimdêrîya leşkeran de beno.
Hewt makîneyî 20 rojî yo bêvindertiş talan kenê
Goreyê agahîyanê ke ma girewtî, 20 rojan ra zêdeyêr o ke bi 7 motoranê birnayîşê daran herême de seat 07.00 ra heta şanî seat 17.00 darî yenê birnayene. Darê ke tîya yenê birnayene, eynî ca de yenê arêkerdene û kesê ke talan kenê, do nê kolîyan bikerê komir. Hetê bînî ra, goreyê agahîyanê ma, çarçewaya nê îhaleyî 3 beşan ra yena pê û her beş de hezar donimî ra zêdeyêr daristan do bêro birnayene.
Bi birnayîşê daristanan heywandarîya herême zerar vînena
Hema ke dewijê Nerbîşî vera talanê daristanî gazinan kenê zî, nêwaşt ke kamera ma rê qisey bikerê. La dewijê ke heywandarîye kenê, bifikarê. Çike goreyê qanûnê daristanan, wexto ke darê herêmêk yenê birnayene, 5 serrî kewtişê heywanan ê na herême qedexe yo. No zî heywanpawitoxan rê zerarêko gird dano.
