Amed – Kayê bi nameyê “Serpêhatiyên Nîkoyê Şilbik” ke îluzyon û mojnayîşê balonan ano têhet, 22ê teşrîna peyêne de promîyerê xo keno.
Tîyatroyê Şaristanî yê Şaredarîya Amedî ya Şaristanê Girdî do promîyerê kayê bi nameyê “Serpêhatiyên Nîkoyê Şilbik” 22ê teşrîna peyêne de saet 13.00 de Merkezê Kultur û Kongreyî yê Çand Amedî de bikero. No kay îluzyon û mojnayîşê balonan ano têhet. Rejîsorîya kayî Elvan Koçer kena; kayî Mehmet Veysî Yoldaşî nuşto û bi xo zî tede kay keno. Kay do dinyaya sêhrine ya îluzyonî û mojnayîşê balonanê rengînan biyaro sahne ser.
Hîkayeya embazîye û parekerdişî
Mojnayîş de hîkayeya îluzyonîstê şîrinî Nîkoyî yena vatiş. Nîko seba ke bireso sîrkê pîlî yê Welatê Keskesorî, yeno îstasyonê trênî la sebebê bêxemîya xo ra nêreseno trên. Gedeyî û temaşekerê ke îstasyon de pawenê, Nîkoyî ra hez kenê û piştdayîşê ey kenê. Bi no hezkerdiş û piştdayîşî Nîko cesaret gêno û dest bi mojnayîşê xo keno. Nişka ra vîneno ke temaşekeran reyde Welatê Balonan ê fantastîkî de yo.
Nîko û gedeyî bi balonanê rengînan kay kenê, zewqê xoza û embazîye gênê û vîr ra kenê ke wext senî vîyareno. Nîko reyna nêreseno trên la na rey fam keno ke o tena nîyo. Keşf keno ke embazîya raşte û parekerdiş mojnayîşo tewr pîl o.










