Ankara – Çalakîya nobete ya roniştişî ya ke seba texlîyebîyayîşê hepsîyanê nêweşan ame destpêkerdiş, roja 3. de dewam kena. Keyeyê hepsîyanê nêweşan ê ke tewrê çalakîye bîyî, bale ante Prosesê Aştî û Komelê Demokratîkî ser û waşt ke dewlete zî gamî bierzo û hepsîyanê nêweşan texlîye bikero.
Keyeyê Hepsîyanê Nêweşan, Komeleya TUAY-DER, DEM Partî, Komeleya Huquqnasan a Seba Azadîye (OHD) û Komeleya Heqanê Merdiman (ÎHD) verê Wezaretê Edaletî de çalakîyêka nobete ya bêmudet dest pê kerdbî. Waştişê çalakîye texlîyebîyayîşê hepsîyanê nêweşan û resayîşê înan bi heqê weşîye yo. Çalakî roja 3. de dewam kena. Parlamenterê DEM Partî û zaf kesî zî seba piştdayîşî tewrê çalakîye bîyî. Çalakî de qelebalixî bê vindertiş sloganê “Hepsîyê sîyasî şerefê ma yê”, “Seba hepsîyanê nêweşan azadî” û “Şerefê merdimîye do îşkenceyî bişikno” eştî. Eşkerayîye de pankartêk ame akerdiş. Pankart ser o nameyê hepsîyanê nêweşan û vateyê “Ma do bi xoverdayîşî berê zîndanan akerê” nuşte bî. Keyeyê hepsîyanê nêweşan Omer Guner, Yakup Akman, Mizgîn Akmane û Selîm Çîfçî Îstanbul ra ameybî. Ê û Dayîkê Aştîye zî tewrê çalakîye bîyî.
‘Dewlete tu game nêeşta’
Herçiqas ke varan varayêne zî, qelebalix verê Wezaretê Edaletî de kom bî û verê çalakîya nobete ya roniştişî eşkerayîye da. Gedeyê Dayîka Aştîye Fînce Akmane, Yakup Akman û Mizgîn Akmane, hepisxane de yê. Fînce Akmane tewrê nobete bîye û dîyar kerd ke her çiqas Prosesê Aştî û Komelê Demokratîkî est o zî, hepsîyê nêweşî texlîye nêbenê. Aye wina vat: “Vanê çareserî, çareserî ka? Hema zî hepsîyî binê şertanê çetinan de yenê tepiştiş. Hema zî hepsîyê nêweşî texlîye nêbenê. Tena Tevgerê Azadîye gamî eştî. Dewlete tu game nêeşta. Ma tîya de vanê: Wa Wezîrê Edaletî gaman bierzo û hepsîyanê ma texlîye bikero.”
‘Madem ke proses est o, çira hepsîyê nêweşî texlîye nêbenê?’
Hulya Gunere waya hepsîyê nêweşî Omer Gunerî ya. Aye ard ziwan ke her çiqas rewşa birayê aye giran a zî, ey tedawî nêkenê û vat: “Lingê birayê mi şikîyayo la ameliyat nêyeno kerdiş. Çira seba Kurdan edalet çin a? Proses ça de yo? Madem ke proses est o, çira hepsîyê nêweşî texlîye nêbenê?”
Safiye Dogan Ergîne embaza hepsîya nêweşe Newroz Bozkurte ya. Aye zî dîyar kerd ke ê seba ke Newroz Bozkurte bigîrê û tedawî bikerê ameyê Ankara û vat: “Hepsîyanê ma texlîye bikerê, ma do teber de tedawîya înan bikerê.”
‘Heta ke hepsîyê nêweşî texlîye bibê, têkoşînê ma do dewam bikero’
Parlamentera DEM Partî Ozgul Sakî zî texlîyenêkerdişê hepsîyanê nêweşan rê reaksîyon mojna û wina vat: “Ma 3 roj o ke seba texlîyebîyayîşê hepsîyanê nêweşan çalakî de yê. Hezaran hepsîyê nêweşî hepisxaneyan de yê. Rewşa zafê înan giran a û hewcedarîyanê xo yê rojaneyan bi xo nêeşkenê bica bîyarê. Astengkerdişê heqê weşîye suc o. Ganî hepsîyê nêweşî tavilî texlîye bibê. Texlîyenêkerdişê hepsîyanê nêweşan sucê şerî yo. Heta ke hepsîyê nêweşî texlîye bibê, têkoşînê ma do dewam bikero.”
Badê eşkerayîye qelebalixî dest bi çalakîya nobete kerd.








