Dayîreyê 8. ê Şûraya Dewletî muracatê îtîrazî yo ke hetê avûkatanê Ekrem Îmamogluyî ra ame kerdene red kerd. Bi nê averşîyayîşî, betalkerdişê dîplomaya Îmamogluyî teqez bi.
Îtîrazê Ekrem Îmamogluyî yê vera betalkerdişê dîplomaya xo ame redkerdene. Qeraro ke behsê ci beno, betalkerdişê dîploma teqez keno. Her çiqas qerar hema ekîbê huqûqî yê Îmamogluyî ra bi hawayêko fermî nêameyo teblîxkerdene zî, averşîyayîş hetê rojnameyê Sabahî ra ame eşkerakerdene.
18ê adara 2025î de Unîversîteya Îstanbulî, seba waştişêkê Serdozgerîya Komare ya Îstanbulî, dîplomaya Serekê Şaredarîya Şaredarîya Girdî ya Îstanbulî Ekrem Îmamogluyî betal kerdbî. Dima Îmamoglu ame destbendkerdene û tepiştene.
Dima ke dîplomaya ci ameye betalkerdene Îmamogluyî seba betalkerdişê qerarî îtîraz kerdbi. Mehkemaya Îdareyî ya Îstanbulî ya 5. no îtîraz red kerdbi, muracatê Mehkemeya Îdareyî ya Herême zî bê netîce mendbi. Peynî de avûkatanê Îmamogluyî bi waştişê tehqîqatêkê peyênî (temyîz) muracatê Konseya Şêwirmendîye kerd. Goreyê xebera rojnameyê Sabahî ke bi nêzdîbîyayîşê xo yê îqtîdarî yeno zanayene, Dayîreyê 8. ê Şêwirmendîye îtîrazê avûkatanê Îmamogluyî red kerd. Bi nê netîceyî reyde qerarê betalkerdişê dîplomaya Îmamogluyî teqez bi.











