Şaredarîya Peyasî eşkera kerd ke seba vateyanê Serekê Rûmetî yê Koç Holdîngî Rahmî Koçî yê vera cinîyanê Kurdan, hêrînayîşê 11 wesayîtanê Otosanê Koç Holdîngî betal kerdî.
Serekê Rûmetî yê Koç Holdîngî Rahmî Koçî Balçovaya Îzmîrî de abîyayîşê Nexweşxaneyê Amerîkanî de heqaretê cinîyanê Kurdan kerd bî. Dimayê ke nê dîmenê nijadperestî yê Rahmî Koçî medyaya dîjîtale de vila bîyî, zaf kesan nêrazîbîyayîş nîşan da û no sey nijadperestîya vera kurdan şirove kerd. Reaksîyonê vera vateyanê Rahmî Koçî dewam kenê. Şaredariya Peyasî zî seba nê heqaretê Rahmî Koçî herîna 11 wesayîtanê Tourneo Courier a Otosanê Koç Holdîngî betal kerdî. Şaredariya Peyasî bi eşkerayîyêka nuştekî dîyar kerd ke ê qijvînayîş û cîyawazîya vera cinîyanê Kurdan qebûl nêkenê. Şaredarîye eşkerayîya xo de teqez kerd ke ê goreyê felsefeya azadîya cinîyan û seypêyîya şaran têgêrenê û vera nêzdîbîyayîşanê wînayînan bêveng nêmanenê.
‘Vera bêrêzîya Cinîyanê Kurdan bêveng nêmanênê’
Şaredariya Peyasî dîyar kerd ke no qerarê goreyê nêzdîbîyayîşê rayberîyanê heremkîyan yê DEM Partî ya bi amancê azadîya cinîyan ameya girewtene û wîna vat: “Cinîyê Kurdî têkoşînê azadî û demokrasî de yew hêzê serkêş ê. Înan awankerdîşê cuya seypêyî û demokratîke de rolêko muhîm kaykerda. Ma vera her tewir nêzdîbîyayîşanê ke rûmetê cinîyanê Kurdan kenê hedef, bêveng nêmanenê.”
