Îstanbul – YCK-Kurd ê Marmara qezaya Sultangazî de seba konferansê herêma Marmara kombîyayîşêk kerd. Endamê YCK-Kurd’î Ramazan Ozdaşli dîyar kerd ke ê do bi awankerdişê komîneyan nê prosesî de biresê serkewtiş û vat: “Ma do mîyanê YCK-Kurd’î de xo rêxistin bikerê. Ganî ma ciwanan sewqê cuyêka rêxistinbîyaye bikerê. Ganî ciwanî vera îstîsmarê kedî xo rêxistin bikerê.”
Yewîya Ciwananê Komînalîstan ê Kurdan (YCK-KURD) ya herêma Marmara do 29ê teşrîna peyêne de konferansê Marmara bikera. Verê konferansî YCK-Kurd seba hedrekarîya konferansî kombîyayîşan kena. Kombîyayîş Salonê Daweta Lîva yê qezaya Sultangazî ya Îstanbulî de ame kerdiş. Salon de pankartê “Bi hêzê cinîyanê ciwanan wextê serkewtişî” û resimê Rayberê Şarê Kurdî Abdullah Ocalanî ameyî akerdiş.
Kombîyayîş seba vîrardişê şehîdanê Kurdîstanî bi yew deqa bêvengî dest pê kerd.
‘Ganî ma vera sîstemî cuyêka alternatîfe awan bikerê’
Badê rêzgirewtişî endamê YCK-Kurd’î Ramazan Ozdaşli qisey kerd. Ramazan Ozdaşli dîyar kerd ke awanbîyayîşê komarî ra heta nika vera Kurdan polîtîkayê qirkerdişî ameyê ramitiş û vat: “10 serranê peyênan de şerêk ame ramitiş. Ciwanan ser o polîtîkayê şerê xususî ameyî ramitiş. Vera nê polîtîkayan rêxistinbîyayîşêk lazim bî. Coka YCK-Kurd ame awankerdiş. Tevgerê Kurdan her tim sey tevgerê ciwanan ame tarîfkerdiş. Serran ra nat têkoşîn estbî. Ewro nameyê nê têkoşînî bî YCK-Kurd. Ma wazenê ke têkoşînê binê sîwanê YCK-Kurd’î de pîl bikerê. Ma do mîyanê YCK-Kurd’î de xo rêxistin bikerê. Ganî ma ciwanan sewqê cuyêka rêxistinbîyaye bikerê. Ganî ciwanî zî vera îstîsmarê kedî xo rêxistin bikerê. Badê vengdayîşê Rayberê Şarê Kurdî Abdullah Ocalanî yê 27ê sibate, mîyanê ciwanan de cehdêk vejîya meydan. Ma têkoşîn kenê ke ciwanî heme rewşanê komelkîyan rê bi hesasîyet hereket bikerê. Ganî ma vera sîstemî cuyêka alternatîfe awan bikerê. Coka ma cuya komînale aver benê. Ma cuya komînale ra dûrî nîyê. Ma do bi awankerdişê komîneyan nê prosesî de biresê serkewtiş.”
Kombîyayîş bi persan û cewaban qedîya.










