Wan – Ciwananê YCK-KURD’î yê Serhedî konferansê xo yo verên viraşt û dîyar kerd ke amancê înan bicaardişê azadîya fîzîkî ya Rayberê Şarê Kurdî Abdullah Ocalanî û rêxistinkerdişê komelê demokratîkî yo.
Yewîya Ciwananê Komunalîstan (YCK-KURD) ya Serhedî bi sloganê “Wext wextê serkewtişî yo” salonê Baroya Wanî de konferansê mintiqaya Serhedî viraşt. Ciwanê ke şaristananê mintiqaya Serhedî ra ameyî, bi kincanê Kurdkî tewrê konferansî bîyî. Endamê Meclîsê Dayîkanê Aştîye û endam û temsîlkarê partîyanê sîyasîyan û sazgehanê komelkîyan ê demokratîkan tewrê konferansî bîyî. Ciwanê ke tewrê konferansî bîyî, bi slogan û rayraşîyayîş kewtî salonê konferansî û sloganê “Ciwanî fedayîyê Rayber Apo yê” û “Jin jiyan azadî” eştî. Salona ke konferans tede ame viraştiş de fotograf û bayraqê Rayberê Şarê Kurdî Abdullah Ocalanî ameyî dardekerdiş. Cayê konferansî de sewbîna pankartê ke tede “Bi ruhê Bendê Çubukî, wext wextê serkewtişî yo”, “Jin jiyan azadî” û “Ma komînan aver berê û azad bibê” nuşte bî, ameyî girewtiş.
Konferans bi hurmetmojnayîşê seba şehîdanê demokrasî û azadîye dest pêkerd. Dima sînevîzyonêko ke derheqê têkoşîn û rêxistinbîyayîşê ciwanan de ameybi amadekerdiş, ame temaşekerdiş.
‘Ma do heme waran de xo rêxistin bikerê’
Konferans bi qiseykerdişê endama YCK-KURD’î Rojîn Atabeye dest pêkerd. Rojîn Atabeye bale ante rêxistinkerdiş û komînbîyayîşê ciwanan ser û wina vat: “Wexto ke Serektî zî dest pêkerd, rêxistin zî tena bî. Ganî ciwanî qet xo tena hîs nêkerê. Ma do xo rêxistin bikerê û pîya têkoşîn bikerê. Ma do bi ziwanê xo estbîyayîşê xo bipawê. Pawitiş bi ziwanê xo û bi awankerdişê komînan beno. Ma do bikewê heme taxan û keyeyan, her kesî bikerê mîyanê komînan. Ma do çîyê qilêrinî yê sey tiryakî û fuhuşî mîyanê xo ra bivejê. Ma do komînanê xo awan bikerê. Seba kerdişî ma hêvîya kesî nêmanê. Problemanê xo ma do bi xo çareser bikerê. Ma do xo heme qilêrîyan ra bipawê.”
Nuşteyo ke seba konferansî ameybi amadekerdiş, hetê endama YCK-KURD’î Asîme Zengîne ra ame wendiş.
‘Amanco sereke bicaardişê azadîya fîzîkî ya Rayber Apo û xorêxistinkerdiş o’
Asîme Zengîne dîyar kerd ke amancê înan verê her çîyî bicaardişê azadîya fîzîkî ya Rayberê Şarê Kurdî Abdullah Ocalanî yo û wina qisey kerd: “Wext, wextê awankerdişê komelê demokratîkî yo Prosesê Aştî û Komelê Demokratîkî de. Ganî ma sey têgêrayîşanê ciwanan cewabê nê prosesî bidê. Wexto ke ciwanî bêrêxistin manenê, komel xirab beno. Îqtîdar her hetî ra yeno ciwanan ser. Ganî ma vera nê çîyî xo rêxistin bikerê. Ma do her hetê komelî de xo rêxistin bikerê. Pêşengê komelê demokratîkî ciwanî yê. Ma do unîversîteyan, lîseyan, meydanan û her ca de problemanê xo çareser bikerê. Ganî yewîyêka ke seba prosesî bibo cewab, bêra awankerdiş. Ma do xebatanê xo seba azadîya fîzîkî ya Rayber Apo û rêxistinkerdişê komelî dewam bikerê.”
‘Seba ke erjê têgêrayîşî biciwîyê, ganî ciwanî xo rêxistin bikerê’
Endama Meclîsê Dayîkanê Aştîye Hediye Kaçake zî ard ziwan ke ganî ciwanî wayîrê keda têgêrayîşî vejîyê û nê çîyî vatî: “Destê ciwanan weş bo. Seba ke qedrê têgêrayîşî bigêrê, ganî ciwanî xo rêxistin bikerê. Qezencanê xo bipawê. Waştişê ciwanan çi bo, ma do hetkarîya înan bikerê. Ma dayîkê şehîdan ê. Ciwanî şerefê ma yê. Na kede keda hezaran şehîdan û hepsîyan a. Çi ke bikewo ma ser, ma do bica biyarê.”
Konferans bi deyîranê Koma Aryenî û govendan qedîya.


















