Wan – Platformê Sazgehanê Demokratîkan ê Wanî derheqê merdişê hepsîyo nêweş Tuncer Saglamî û binpaykerdişê heqan ê hepisxaneyan de eşkerayîyêke da. Platformî waşt ke Heyetê Îdare û Çimdarîye bêrê wedaritiş û hepsîyê nêweşî bêrê azadkerdiş.
Platformê Sazgehanê Demokratîkan ê Wanî vera binpaykerdişê heqan ê hepisxaneyan û merdişê hepsîyo nêweş Tuncer Saglamî Kuçeya Hunerî ya qezaya Rêya Armûşî de eşkerayîyêke da. Eşkerayîye de pankartê “Azadî seba hepsîyanê nêweşan” ame akerdiş û sloganê “Biciwîyo xoverdayîşê hepisxaneyan” ame vatiş. Endam û îdarekarê partîyanê sîyasîyan û sazgehanê sîvîlan tewrê eşkerayîye bîyî.
‘ATK heqê cuye erzeno tehluke’
Metnê eşkerayîye hetê îdarekarê TUHAY-DER’î Nedîm Şîpalî ra ame wendiş. Nedîm Şîpalî dîyar kerd ke hepisxaneyanê Tirkîya de binpaykerdişê heqan ê sîstematîkî yê vera hepsîyanê sîyasîyan her roj netîceyanê giranêran anê.
Nedîm Şîpalî qetî kerd ke astengkerdişê heqê weşîye û cuye û bêparkerdişê hepsîyanê ke înfazê xo qedênayo azadîye ra, resayo seviyeyêka tewr pîle û wina vat: “Tuncer Saglam ke Hepisxaneya Emnîyetê Berzî ya Wanî de amêne tepiştiş, rixmê problemanê xo yê giranan ê weşîye zî wextê xo de nêresayo teşhîs û tedawîyêka bitesîre. 7ê teşrîna peyêne ya 2026î de Nêweşxaneya Bajarî ya Etlîkî ya Ankara de cuya xo vîndî kerda. Rixmê nîşananê bedenê ey ê seviyeya averşîyayîye û muracaetanê azadkerdişî zî, bi astenganê burokratîkan qerarê erey vistişê înfazî nêameyo dayîş. Sazgehê Tibê Edlî (ATK) bi helwestanê xo yê erey vistişî heqê cuye raste-rast erzeno tehluke.”
‘Heyetê Îdare û Çimdarîye înfazan vêşnenê’
Nedîm Şîpalî bale ante qerarê keyfî yê Heyetanê Îdare û Çimdarîye ser û nê çîyî ardî ziwan: “Hepsîyê sîyasî yê ke cezayê xo bi hawayêko qanûnî qedênayo, bi ferzkerdişê poşmanîye û bi raporanê bêbingeyan ê huqûqî hepisxaneyan de yenê tepiştiş. Nê heyetî kewenê cayê mehkemeyan û sey meqamêkê dîyinî yê muhakemekerdişî heqê azadî û emnîyetê şexsî binpay kenê.”
‘Destpêkê prosesî ra nat 16 hepsîyan cuya xo vîndî kerda’
Hemserekê DBP’yî yê Wanî avûkat Cemal Demîrî zî dîyar kerd ke persa hepsîyanê sîyasîyan persa heme merdimîye ya û kesê ke hepisxaneyan de cuya xo vîndî kenê, şermê her kesî yo. Cemal Demîrî ard ziwan ke destpêkê prosesî ra nat 16 hepsîyan cuya xo vîndî kerda û halê bi seyan hepsîyan zî zaf xirab o û wina vat: “Ganî qanûnan nêpawê û nê embazî tavilî bêrê azadkerdiş. Ma tîya ra veng danê ke goreyê komelê exlaqî têbigêrê. Kampusan de her çiqas revîrî bibê zî, îmkanê tedawîye çin o. Problemêko bîn zî îdare yo; ne goreyê qanûnî ne zî goreyê heqê cuye têgêreno. Mesulê hepisxaneyan îqtîdar o. Komîsyono ke ameyo awankerdiş, xo îqtîdarî ra girêdayeyî verdayo. No çî goreyê destûrê bingeyênî nîyo û ma no çî qebul nêkenê.”
‘Her kes berpirsîyar o’
Cemal Demîrî dîyar kerd ke Tuncer Saglamî çend rojî verê cû cuya xo vîndî kerd û qiseyê xo wina qedêna: “Berpirsîyarî îhmal ê û her kes berpirsîyar o. Bê ke wext bivîyaro, ganî cigêrayîş bêro akerdiş û berpirsîyarî hesab bidê. 2 serrî yo proses dewam keno. Hetê kurdan zaf gamî eştî, la hema zî hepsîyê nêweşî nêameyê azadkerdiş. Prosesê verênî de hepsîyê nêweşî goreyê raporan amêne azadkerdiş, la na rey no çî nêame kerdiş; no goreyê qanûnî nîyo. Êdî wext ameyo ke qanûn û prosesê azadîye bibê cewab. Ganî hepsîyê nêweşî tavilî bêrê azadkerdiş. Ma berpirsîyaran rê veng danê ke berpirsîyarîye bigêrê xo ser.”
Eşkerayîye bi eştişê sloganan qedîyaye.
