Îdareyê Têgêrayîşî eşkerayîya xo ya derheqê Prosesê Aştî û Komelê Demokratîkî de mesajê “Îradeyê ma yê çareserîya sîyasî ya demokratîke tam o. Wexto ke îqtîdarê AKP’yî warê huqûqî yo hewce temîn bikero problem do çareser bibo” daye.
Îdareyê Têgêrayîşî derheqê Prosesê Aştî û Komelê Demokratîkî de eşkerayî daye. Îdareyê Têgêrayîşî wina vat: “Îradeyê ma yê çareserîya sîyasî ya demokratîke tam o. Gamê ke ma eştî zî îspatê ney ê. Wexto ke îqtîdarê AKP’yî seba beşdarbîyayîşê cuya sîyasî ya demokratîke warê huqûqî temîn bikero problem do ca de çareser bibo.”
Eşkerayîya Îdareyê Têgêrayîşî de wina ame vatene:
“Badê Vengdayîşê Aştî û Komelê Demokratîkî yê Rayber Apoyî yê 27ê sibate 2025î PKK kongreyê xo arê da. PKK peynîya têkoşînê çekdarî yê vera Tirkîya arde û xo fesh kerd. 11ê temmuze 2025î de seba mojnayîşê îradeyê qedênayîşê têkoşînê çekdarî çekî bi sembolîkî ameyî veşnayene. 26ê teşrîna verêne 2025î de gerîlayî cayanê ke zereyê sînoranê Tirkîya de rîskê*pêkewtişî tede est bî, ê cayan ra ancîyayî teberê sînorî. Badê ke qanûn vejîya aşma teşrîna verêne 2026î de heme gerîlayî ameyî teberê Tirkîya. Huçreyê ke metropolan de hewn de bî, ê zî ameyî Herêmanê Pawitişî yê Medya. Di aşmanê peyênan de 10 ra zêde şikefteyê ke çeperê şerî bî û nêzdîyê sînoranê Tirkîya de bîyê, ameyî vengkerdene. Êdî nêzdîyê sînoranê Tirkîya û nuqteyanê leşkerîyan de ke artêşa tirke tede ca bîya, yew qewetê ma yê leşkerî zî nêmendo. Bêpêkewtişî tena sey qerarêkê îradî ney, hetê cografî ra zî ameya temînkerdene. Nê hetî ra dewlete û artêşa tirke nêşênê qalê tehdîdêkê leşkerî yê vera xo bikerê. Ma no verê cû zî raya pêroyî ya Tirkîya û dinya rê eşkera kerdbi.
Dinya de tu cayêk de ke bi desan serran pêkewtiş tede bîyo, têgêrayîşêk nêbîyo ke sey ma gamanê wina balkêş û lezan bierzo. Nê hetî ra gamanê ke ma eştî raya pêroyî ya zere û teberî de şaşbîyayîş viraşt. Çunke tu qewet û tu kes nêpawitbi ke gamê stratejîkî yê winasî demêko kilm de bêrê eştene.
Na raştîye çareserîya demokratîke de qerardarîya Rayber Apoyî û yê ma mojnena. Na qerardarîya ma îfadeyê bedilnayîşê stratejîyê ma yê têkoşînî yo. Vera gamanê ke ma eştî îqtîdarê AKP’yî gamê şênberî nêeştî û naye raya pêroyî ya dinya û Tirkîya de derheqê amancanê AKP’yî de şik viraşt. Wina ke nêeştişê gamanê demokratîkan ê babetanê ke raporê komîsyonê meclîsî de ameyî dîyarkerdene û qanûn nêwazenê, nê şikî kerdî zêde.
Vera nêeştişê gamanê îqtîdarê AKP’yî raya pêroyî de munaqeşeyê ‘gelo proses xetimîya, qedîya?’ ameyî kerdene. Şarê kurdî û raya pêroyî ya demokratîke ya Tirkîya her firsend de venga hukmatî da ke seba demokratîkbîyayîş û çareserîya meseleya kurdan gaman bierzo.
Ma sey Têgêrayîşê Azadîya Kurdîstanî gamê zaf bicesaret û radîkalî eştî la îqtîdarê AKP’yî gamî nêeştî. Prosesêkê winasî de tayê dormeyî averneşîyayîşê prosesî Îdareyê Têgêrayîşî ra girê danê û no yeno a mana ke raştîyan cîya mojnenê. Derheqê xo û cayê xo yê têkoşînî yê ameyoxî de tu endîşeyê Îdareyê Têgêrayîşê ma çin o. Endîşeyê ma yo tekane o yo ke demokratîkbîyayîşê Tirkîya û çareserîya meseleya kurdan bê erey bibê.
Ma her firsend de fikrê xo ard ziwan ke averşîyayîşê prosesê aştî û komelê demokratîkî tena bi azadîya Rayber Apoyî beno. Ma vat û vanê ke verê her çî ganî Rayberîya ma bireso şertanê ciwîyayîş û xebitîyayîşê azadî û seba naye zî komîteya aştî û sîyasîbîyayîşî dest bi xebate bikero.
Ma îradeyê xo yê peyserameyîşê Tirkîya û beşdarbîyayîşê cuya sîyasî ya demokratîke bi eşkera na ro. Wexto ke sîstemo huqûqî yo ke naye temîn keno bêro viraştene peyserameyîşê Tirkîya do bibê. Nê hetî ra lez averşîyayîşê prosesî pêro girêdayeyê eştişê gamanê nê hetî yo. Îradeyê ma yê çareserîya sîyasî ya demokratîke tam o. Ma prosesê aştî û komelê demokratîkî bi bawerî domnenê. Gamê ke ma eştî zî îspatê ney ê. Wexto ke îqtîdarê AKP’yî seba beşdarbîyayîşê cuya sîyasî ya demokratîke warê huqûqî temîn bikero problem do zaf ca de çareser bibo. Nê hetî ra ma pêro beşdarê nê fikrî benê ke problem tena bi bêçekbîyayîş çareser nêbeno û ganî gamê demokratîkbîyayîşî bêrê eştene ke sebebanê viraştoxanê meseleya kurdan zî hewanê. Çunke bi demokratîkbîyayîşê Tirkîya sere de meseleya kurdan û meseleya elewîyan heme problemê Tirkîya do çareser bibê. Wina Tirkîya do problemanê xo yê sîyasî, ekonomîk û komelkîyan çareser bikero û heme enerjîyê xo bido averşîyayîşê komelkî.
Tirkîyayêka demokratîke ya winasî zî do tena seba şaranê Rojhelatê Mîyanênî ney, seba heme dinya baş biba.”
