Hepsîyê Apoyî Tuncer Saglam ke hepisxane de cuya xo vîndî kerde, ard vîrî û vat ke ganî êdî mesulê dewlete seba Prosesê Aştî û Komelê Demokratîkî fek qiseyan ra veradê û gamanê laziman bierzê.
Hepsîyê Apoyî derheqê problemanê hepisxaneyan û Prosesê Aştî û Komelê Demokratîkî de eşkerayîyêka nuştekîye da. Hepsîyê Apoyî eşkerayîya xo de bale ante azadîya fîzîkî ya Rayberê Şarê Kurd Abdullah Ocalanî ser û vat ke ganî Rayber Apo û heme hepsîyê sîyasî tavilî bêrê azadkerdiş.
Eşkerayîya Hepsîyanê Apoyî wina ya:
“Ma sey hepsîyanê sîyasîyan ê ke serranê dergan o sebebê fikr, nasnameya xo ya sîyasî û girêdayîbîyayîşê xo yê têkoşîna azadîye ya şarê ma ra hepisxaneyan de yenê tepiştiş, ewro şarê xo û raya pêroyîye rê veng danê.
Prosesê Aştî û Komelê Demokratîkî ke hetê Rayberîya ma ra dest ameyo destpêkerdiş, vurîyayîş û transformasyonêko stratejîk o. No proses awankerdişê cuya komelî, têkilîyanê sîyasîyan û fehmkerdişê têkoşîne bingeyanê demokratîkan ser o pêşbînî keno. Vîyartişê stratejîya têkoşîna çekdare ra ver bi stratejîya komelê demokratîkî û sîyasetê demokratîkî, verê her çîyî berpirsîyarîyanê tarîxîyan erzeno ser milê dewlete, îqtîdarî û heme aktoranê komelîyan û sîyasîyan. Ganî gamê şênberî yê goreyê ruhê nê prosesî bêrê eştiş, şert û mercê şerê vîyarteyî bêrê bedilîyayîş û rayîrê çareserkerdişê demokratîkî bêro akerdiş.
‘Zextê hepisxaneyan nêyenê qebulkerdiş’
La ewro nêeştişê gamanê demokratîkan û huqûqîyan ê ke proses wazeno, nêzdîbîyayîşêko mijûlker ê îqtîdarî û dergkerdişê wextî, taybetî seba hepsîyanê sîyasîyan ê hepisxaneyan, beno sebebê netîceyanê giranan û bêagêrayîşan. Wexto ke behsê komelîbîyayîşê aştî û akerdişê rayîrê sîyasetê demokratîkî yeno kerdiş, zextê hepisxaneyan ê sey cayanê tecrîdî, cezakerdiş, ferzkerdişê poşmanîye û şikitişê îradeyî bi cewherê prosesî reyde eşkera hemberê yewbînanê.
Ewro bi seyan embazê ma problemanê giranan ê weşîye, nêweşîyanê averşîyayeyan û şert û mercanê ke cuya înan erzena tehluke reyde rî bi rî yê. Erey vistişê şawitişê înan ê nêweşxaneyan, astengkerdişê tedawîya înan û awannêkerdişê şert û mercanê însanîyan ê ke halê înan ê weşîye wazeno, nêyeno qebulkerdiş. Wexto ke heqê cuye û heqê weşîye mabên de bê, tu bahaneyêko sîyasî, îdarî yan zî yê emnîyetî nêeşkeno na berpirsîyarîye wedarno. Tepiştişê hepsîyanê nêweşanê giranan hepisxaneyan de yeno a mana ke cuya înan bi eşkerayî erzîyena tehluke.
‘Ma keyeyê Tuncer Saglamî rê serweşîye wazenê’
Peynî de şehadetê embazê ma Tuncer Saglamî nîşaneya tewr tale ya na raştîye ya. Ey vera nêweşîya giran a kanserî têkoşîn kerdêne û rixmê heme şert û mercanê hepisxane zî îradeya xo ya têkoşîna azadî û komelê demokratîkî nêverdaye. Vîndîkerdişê cuya ey reyna mojna ke heqê weşîye û tedawîye yê hepsîyanê nêweşan, problemêko heqê cuye yo ke nêbeno erey bêro vistiş.
Ma embazê xo Tuncer Saglamî bi îradeya ey a kurdê azadî, bi girêdayîbîyayîşê ey ê şarê xo û têkoşîna komelê demokratîkî reyde anê vîrî. Şexsê ey de heme embazanê xo yê ke hepisxaneyan de şehîd kewtê, bi hurmet û minetdarî anê vîrî. Verê her çîyî keye û merdimanê ey rê û şarê xo yê welatperwerî rê serweşîye wazenê. Ma soza xo newe kenê ke ma do cuya ey a têkoşîne û vîrê ey awankerdişê komelê demokratîkî û cuya azade de ganî biverdê.
Prosesê Aştî û Komelê Demokratîkî mecbur keno ke problemê hepsîyanê sîyasîyan ê ke ewro hepisxaneyan de yê, bi perspektîfa çareserkerdişê demokratîkî bêro erjnayîş. Cuya komelî de çareserbîyayîşê aştî girêdayeyê eştişê gamanê şênberan o; ê cayan de ke binpaykerdişê heqan ê tewr giranî uca benê.
‘Ganî tetbîqatê bêhuqûqî bêrê qedênayîş’
Xebitnayîşê keyfî yê qerarê înfazî yê ke sîstemê huqûqî de ameyê tarîfkerdiş û bi maneeyanê îdarîyanê cîya-cîyayan bêparkerdişê hepsîyanê sîyasîyan ê ke cezayê xo qedênayo azadîya înan ra, nêyenê qebulkerdiş. Prosesanê azadkerdişî de dîyarkerdişê erjnayîşanê sîyasîyan, ferzkerdişê poşmanîye û polîtîkayê zextî yê ke amancê înan şikitişê îradeyî yo, îdiaya demokratîkbîyayîşî reyde pê nêgênê. Tu kes nêeşkeno sebebê fikr, nasnameya xo ya sîyasî û helwestê xo yê têkoşîna demokratîke ra hepisxane de bêro tepiştiş. Na çarçewe de ganî hepsîyê nêweşê giranî tavilî bêrê azadkerdiş û resayîşê înan ê bêşert û merc ê xizmetanê tedawî û weşîye bêro garantîkerdiş. Ganî embazê ma yê ke rixmê qedênayîşê înfazê xo yê zî azad nêbenê, bêrê azadkerdiş û tetbîqatê bêhuqûqî yê hepisxaneyan bêrê qedênayîş.
Îqtîdar yew hetî ra qiseyê aştî û çareserkerdişê demokratîkî dewam keno, hetê bînî ra vera na raştîya girane ya hepisxaneyan berpirsîyarîyanê xo bica nêano; no bawerîya komelî ya prosesî rê zerar dano. Aştî tena bi qiseyan aver nêşona; aye bi eştişê gamanê şênberan ê huqûqîyan û sîyasîyan û bi garantîkerdişê heq û azadîyanê bingeyînan aver şona.
Ma tîya bi eşkerayî îqtîdar û mesulanê dewlete rê veng danê:
Prosesê Aştî û Komelê Demokratîkî tena seviyeya qiseyî de meverdê; ganîyîyê ey bica biyarê! Problemê hepsîyanê sîyasîyan ê hepisxaneyan bi perspektîfa çareserkerdişê demokratîkî bierjnê. Karê tedawî û azadkerdişê hepsîyanê nêweşanê giranan tavilî bica biyarê. Bi tetbîqatanê keyfîyan ê înfazî verê azadîya hepsîyanê ke cezayê xo qedênayo, megirê. Ferzkerdişê poşmanîye, polîtîkayanê tecrîdî û tetbîqatanê bêhuqûqîyan biqedênê. Seba vengkerdişê hepisxaneyan bê erey vistiş gamanê şênberan ê huqûqîyan û sîyasîyan bierzê!
Ma reyna dîyar kenê ke serkewtişê Prosesê Aştî û Komelê Demokratîkî tena bi qiseyî ney, bi pratîkî mumkin o. Verê her çîyî azadîya fîzîkî ya Rayberîya ma û azadkerdişê heme hepsîyanê nêweşan rew ra rew, rojeva nê prosesî ya ke nêbena erey bêra vistiş.
No bingehî ser o, ma sey Hepsîyanê Apoyî, reyna bi bawerî û îradeya xo ya qerardare ya seba têkoşîna azadî, aştî û komelê demokratîkî, seba bicaameyîşê hesreta şarê ma ya aştî, seyyewbînî û azadîye, ma do têkoşîna xo pîl bikerê.”
