EGE-TUHAYDERî vernîya Edlîyeya Îzmîrî de bale ante rewşa hepsîyanê nêweşan ser o û dîyar kerd ke hepisxaneyan de bi hezaran nêweşî est ê. Eşkerayîye de merdişê Tuncer Saglamî ame vîrardene û ame waştene ke hepsîyê nêweş û sîyasîyî cade bêrê verdayene.
EGE-TUHAYDERî vernîya Edlîyeya Bayrakli ya Îzmîrî de eşkerayî daye ke hepsîyê nêweşî bêrê verdayene. Eşkerayîye de sloganê “Bijî xoverdayîşê zîndanan”, “Awankerê haştîye Îmrali de yo” û “Hepsîyanê sîyasîyan rê azadî” ameyî berzkerdene û fotografê kesanê ke hepisxaneyan de cuya xo ra bîyî ameyî kirîştene.
Parlamenterê DEM Partî yê Îzmîrî Îbrahîm Akin, Dayîkê Haştîye, aktîvîstê Têgêrayîşê Cinîyanê Azadan (TJA), rêxistinê heq û huqûqî û zaf kesî cayê eşkerayîye de amade bîyî. Eşkerayî hetê Hemsereka EGE-TUHAYDERî Ayfer Yildirime ra ameye wendene.
Yildirime ard vîrî ke Tuncer Saglam 21ê nîsane 2025î de ameybî tepîştene û Hepisxaneyê Emnîyetê Berzî yê Wanî de semedê îhmalî ra cuya xo ra bîyo. Aye wina vat: “Tuncer Saglamî bi aşman vera nêweşîyanê giranan têkoşîn da. Şikê kanserê pankreasî est bî la bi behaneyê ‘teşxîs nêameyo ronayene’ nêame verdayene. Ganî berpirsîyarîya îdareyê hepisxaneyî, mercîyanê edlîyan û dezgehanê weşîye bêra cigêrayene.”
Yildirime da zanayene ke înfazê hepsîya nêweşe Pinar Tîkîte reya dîyine ame taloqkerdene, mezgê Tîkîte de kîstê araknoîdî est o û a şertanê hepisxaneyî de nêyena tedawîkerdene. Aye bale ante rewşa Evîn Zapsû ser o zî ke 10 serrî yo Hepisxaneyê Bunyanî yê Qeyserî de ya û bi şikê kanserî bîyopsîbîya.
Yildirime wina vat: “Goreyê doneyanê ma hepisxaneyan de bi hezaran hepsîyê nêweşî est ê. Binpaykerdişê heqê resayîşê weşîye, nêverdayîşê nêweşanê giranan û tepîştişê înan ê hucreyanê yewkesîyan de nêyeno qebulkerdene. Haştî û huqûq ganî verê berê hepisxaneyan de nêqedîyê. Ma reyna venga Wezaretê Edaletî danê: Ganî hepsîyê nêweşî cade bêrê verdayene!”
Parlamenterê DEM Partî Îbrahîm Akinî zî wina vat: “Demokrasî û huqûqê welatêk bi hawayê hereketê vera hemwelatîyanê hepisxaneyan dîyar benê. Ma haştî û demokrasî wazenê û wazenê ke qanûno ke parlamento ra vîyarto lezabez bikewo meriyet.” Eşkerayî bi berzkerdişê sloganan qedîyaye.
