TUHAY-DERa Riha vera binpaykerdişanê heqan û rewşa hepsîyanê nêweşan eşkerayî daye. Eşkerayîye de ame waştene ke hepsîyê nêweşî cade bêrê verdayene û ame vatene: “Nêverdayîşê hepsîyanê nêweşan ke verê merdişî de yê bi xo zî hêrişêkê vera prosesî yo.”
Temsîlkarîya Riha ya Komela Piştîdayîş û Ardimî ya Keyeyanê Hepsî û Girewteyan (TUHAY-DER) vera binpaykerdişanê heqan ê hepisxaneyan eşkerayî daye. Eşkerayî vernîya Edlîyeya Riha de ameye dayene û zaf kesî beşdar bîyî.
Eşkerayîye ra ver hetê Ciwananê Welatperwer ê Kurdîstanî (YCK) ra pankartêk ame akerdene ke ser o “Bi hêvîya xoverdayîşê ke zîndanan de veng da, ma do cuya azade awan bikerê” nuşte bî. Çalakîye de sloganê “Bijî berxwedana zîndanan” û “Şehîdî namirin” ameyî vatene.
HemverfekaTemsîlkarîya TUHAY-DER’î Ayla Ozdemîr Barline eşkerayîye de qisey kerd û wina vat: “Ganî hepisxaneyî nêbê cayê bêtedawîmendiş û merdişî. Nê vindîbîyayîşê bidejî reyna ma rê mojna ke ganî hepsîyê nêweşî cade bêrê verdayene û heqê înan ê cuye bêro *garantîkerdene. Ganî peynîya nê pratîkanê bêqanûnan ê vera hepsîyanê nêweşan bêro ardene û astengê qanûnî û îdarî yê vernîya verdayîşî bêrê hewanayene. Amancê Prosesê Haştî û Komelê Demokratîkî o yo ke înkarê se serran biqedîyo û wayûbirayîya tarîxî xurt bibo. Nêverdayîşê hepsîyanê nêweşan ke verê merdişî de yê hêrişê vera prosesî yo û hem zî hêrişê huqûqê wayûbirayîye ser o yo.”
