Parlamenterê DEM Partî Omer Ocalan û Hemserekê Pêroyî yê DBP’yî Keskîn Bayindir Awusturya de pêvînayîşanê şarî de prosesê çareserkerdişî û hadiseyanê Herêma Federale ya Kurdîstanê Îraqî ser o qisey kerd. Keskîn Bayindirî dîyar kerd ke Rayberê Şarê Kurd Abdullah Ocalanî partîyanê sîyasîyan ê mintiqa rê mektube şawito. Bayindirî bale ante ser ke mektub de vengdayîşê dîyalogî seba pawitişê yewîya neteweyî ya kurdan û awanîyêka pawitişî ya hemparîye ya hêzanê pêşmergeyan vejîyayo vernî.
Parlamenterê Partîya Seyyewbînî û Demokrasîya Şaran (DEM Partî) Omer Ocalan paytextê Awusturya Vîyana de, Hemserekê Pêroyî yê Partîya Herêmanê Demokratîkan (DBP) Keskîn Bayindir zî bajarê Gotzisî yê eyaletê Vorarlbergî yê Awusturya de pêvînayîşanê şarî de ca girewt.
Omer Ocalan û Keskîn Bayindirî qiseykerdişanê xo de prosesê çareserkerdişî û hadiseyê Herêma Federale ya Kurdîstanê Îraqî erjnayî.
‘Kişta Rayber Ocalanî de 5 hepsîyî est ê’
Omer Ocalanî munaqeşeyanê ser şert û mercanê hepisxane yê Rayber Ocalanî ra behs kerd û dîyar kerd ke rêzkerdişo ke ameyo kerdiş, bînayêka di qatîne ya mîyanê hepisxaneyî de ya.
Omer Ocalanî da zanayîş ke na bîna de, qatê cêrî û corî de çend odeyî est ê. Kişta Rayber Ocalanî de zî panc kesê ke sebebê qerarê cezayê muebedê girankerdeyî û muebedî ra serranê dergan o hepisxane de yenê tepiştiş, est ê.
Omer Ocalanî îfade kerd ke proses hêdî aver şono û dîyar kerd ke rixmê problemanê ke benê zî, Rayber Ocalan derheqê çareserkerdişî de qerardar o. Omer Ocalanî dîyar kerd ke ganî nêzdîbîyayîşê ey sey helwestêko rojane yan taktîkî nêbêro erjnayîş.
‘Seba çareserkerdişî gamê huqûqî û sîyasî’
Hemserekê Pêroyî yê DBP’yî Keskîn Bayindirî zî pêvînayîşê şarî yê Gotzisî de qiseykerdişê xo de dîyar kerd ke qedîyayîşê têkoşînê çekdarî, a mana nêdano ke problemê kurdan çareser bîyê.
Keskîn Bayindirî dîyar kerd ke fesihkerdişê PKK’yî “qerarê tarîxî yê ke badê têkoşînêko derg ameyê girewtiş” ê û wina vat: “Qedîyayîşê têkoşînê çekdarî, a mana nêdano ke problemê kurdan çareser bîyê. Seba ke çareserkerdişo demokratîk bêro ca, ganî dewlete gamanê şênberan ê huqûqî û sîyasî bierzo.”
Keskîn Bayindirî derheqê gamanê şênberan ê ke ganî bêrê eştiş de zî îfade kerd ke ganî nasnameya kurdan bi destûrî bêro garantîkerdiş, heqê perwerdeyê kurdkî bêro naskerdiş, azadîya sîyasetê demokratîkî û rêxistinbîyayîşî bêra temînkerediş, îdareyê mehelî bêrê xurtkerdiş û “rêzkerdişê qanûnî yê ke polîtîkayanê înkarî rê bingeh ê” bêrê vurnayîş.
‘Rayber Ocalanî partîyanê Herêma Federale ya Kurdîstanê Îraqî rê mektub şawito’
Keskîn Bayindirî hadiseyanê sîyasîyan ê Herêma Federale ya Kurdîstanê Îraqî ser o zî qisey kerd û dîyar kerd ke krîzo sîyasî qezencanê kurdan rê zerar dano. Keskîn Bayindirî hêzanê sîyasîyan û komelkîyan ê mintiqa rê veng da ke yewîya neteweyî û qezencanê kurdan bipawê û îfade kerd ke ganî problemî bi rayîrê dîyalogî bêrê çareserkerdiş.
‘Ganî hêzê pêşmergeyan kontrolê partîyan ra bêrê vetiş’
Keskîn Bayindirî da zanayîş ke Rayber Ocalanî partîyanê sîyasîyan ê Kurdîstanê Federalî rê mektube şawito û mektubî înan bi xo resnayo. Ey vat ke ê hem Neçîrvan Barzanî hem zî Bafil Talabanî reyde pêvînayîş kerdo.
Keskîn Bayindirî ard ziwan ke Rayber Ocalanî vato ganî yewîya neteweyî ya kurdan bêra xurtkerdiş û hêzê pêşmergeyan kontrolê partîyan ra bêrê vetiş û bi awanîyêka pawitişî ya hemparîye bêrê girêdayîş. Keskîn Bayindirî îfade kerd ke problemê ke benê, heme şarê kurdî eleqedar kenê û veng da ke çareserkerdiş erey nêro vistiş.
Badê ke Keskîn Bayindirî cewabê persanê beşdaran dayî, pêvînayîş qedîya.
