Înîsîyatîfê Yewîya Demokratîke derheqê hadiseyanê Başûrê Kurdîstanî de eşkerayîyêke weşanaye û waşt ke hetê Başûrî problemanê xo bi rayîrê dîyalogî çareser bikerê.
Çend rojî verê cû, badê di serran Parlamentoyê Herêma Federale ya Kurdîstanî raya verêne kom bî. Kombîyayîş de serekê meclîsê parlamentoyî ame weçînayîş. Dima ra Serekê YNK’yî Bafil Talabanî eşkerayîyêke da û vat ke ê xo Hukmatê Başûrî ra antê.
Înîsîyatîfê Yewîya Demokratîke hesabê xo yê medyaya dîjîtale ser o derheqê nê hadiseyî de eşkerayîyêke da. Înîsîyatîfî waşt ke problemê ke est ê, bi rayîrê qiseykerdişî bêrê çareserkerdiş.
‘Nê problemî statuya kurdan erzenê tehluke’
Înîsîyatîfê Yewîya Demokratîke dîyar kerd ke şarê Başûrê Kurdîstanî statuya ewroyêne bi bedêlanê giranan qezenc kerd û wina vat: “Waye û birayê ma yê Başûrê Kurdîstanî bi xoverdayîşêko bedêlgiran statuya xo qezenc kerde. La heyf ke sebebê problemanê mîyanênan ra munaqeşeyê statuya Başûrê Kurdîstanî ser o zî vejîyayê meydan. Sey ke vizêr çimê heme kurdîstanijan Rojawanê Kurdîstanî ser o bî, na rey zî çimê her kesê kurdperwerî Başûrê Kurdîstanî ser o yo. Çunke şarê ma bi fikar o ke problemê mabênê hêzanê kurdan hîna kûr bibê û statuya kurdan ê Başûrê Kurdîstanî zeîf bêro kerdiş.”
‘Ma veng danê dîyalog û yewîye’
Înîsîyatîfê Yewîya Demokratîke îfade kerd ke ganî partîyê sîyasî yê Başûrî menfeetanê şexsîyan ser o nêfikirîyê û qiseyê xo wina qedêna: “Ma bi fikar û xemgînî hadiseyanê negatîfan ê ke Başûrê Kurdîstanî de qewimîyenê, taqîb kenê. La bawerîya ma aye ke her di hêzê kurdan, YNK û PDK, do bieşkê problemanê xo yê mîyanênan bi rayîrê dîyalogî çareser bikerê. Çunke mîyanê şert û mercanê zehmetan ê Rojhelatê Mîyanênî de wext, wextê menfeetanê şexsî yan partîyî nîyo. Wext, wextê destpêgirewtişî yo ke şarê Kurdîstanî bêro pawitiş. Ganî vîr ra nêbo ke Başûrê Kurdîstanî statuya xo bi saya peymanêka stratejîke ya hemparîye qezenc kerde. Rixmê ser ra bi desan serrî bivîyerê zî, ganî peymana stratejîke ya mabênê partîyanê Başûrî nêbêro wedaritiş. Tersê ci, ganî peymanê yewîye bi amancê xurtkerdişî bêrê newekerdiş. Nê çarçewe de vengê ma waye û birayanê ma yê Başûrê Kurdîstanî rê yo ke rayîrê dîyalog û pêameyîşî hetanî peynî akerê û mîyanê xo de yewîya demokratîke awan bikerê.”
