Anqara – Cîgira Hemserekanê Pêroyî ya DEM Partî Ebru Gunaye, ke Başûrê Kurdîstanî de forumê MERIyî de beşdar bîya, derheqê fotoya nûnerê kurdan a forumî de vat ke foto seba yewîye hêvî dana û vat: “Averşîyayîşê heme parçeyan yewbînan ra girêdayî yo.”
Enstîtuya Lêkolînê ya Rojhelatê Mîyanênî (MERI), 12 û 13ê teşrîna verêne de Hewlêrê Başûrê Kurdîstanî de forumêk organîze kerd. Endama Komîteya Têkilîyanê Teberî ya Meclîsa Gelî ya Sûrîye Îlham Ehmed, Şêwirmendê Serekatîya Sûrîye Mazlûm Ebdî, Serekê Herêma Federe ya Kurdîstanî Neçîrvan Barzanî, Hemserekê Pêroyî yê DEM Partî Tuncer Bakirhan, Serekê Pêroyî yê Yekîtîya Niştimanî ya Kurdîstanî (YNK) Bafil Talabanî, Cîgirê Serekê Pêroyî yê YNK’yî Qubad Talabanî, Serekwezîro verên yê Iraqî Muhammed Şîya Es-Sudanî, zaf pispor, sîyasetmedar û aktîvîstî forum de beşdar bîyî. Forum de ewleyîya herêmî, veraroja Sûrîye û Rojavayî, têkilîyê Hewlêr û Bexdayî û Prosesê Aştîye û Komelê Demokratîkî yê Vakurê Kurdîstanî û Tirkîya ame munaqeşakerdene.
Hemserekê Pêroyî yê DEM Partî Tuncer Bakirhan zî bi heyetêk reyde forum de beşdar bî. Forum ra dima nîqaşanê ke ame ver ra yew, yewîya neteweyî ya kurdan bî. Bi taybetî fotoya Îlham Ehmed, Mazlûm Ebdî, Tuncer Bakirhan, Neçîrvan Barzanî û Qubad Talabanî, ke pîya ame girewtene, seba yewîya neteweyî şarî mîyan de hêvî viraşt.
Cîgira Hemserekanê Pêroyî ya DEM Partî û Berpirsyara Komîsyona Têkilîyanê Teberî Ebru Gunaye, ke forum de beşdar bîya, ajansa ma rê derheqê pêvînayîşanê Başûrê Kurdîstanî û nîqaşanê yewîya neteweyî de qisey kerd.
‘Pêşkewtişê heme parçeyan yewbînan ra girêdayî yo’
Ebru Gunaye vat ke forum de rewşê Rojhelatê Mîyanênî bi giştî ame nirxnayene û wina vat: “Rewşê Rojawanî, Vakurî û Başûrî ame nirxnayene. Beşanê Kurdîstanî ra nûnerî beşdar bîyî û derheqê rewşa herêmî de qisey kerdî. Prosesê Aştîye û Komelê Demokratîkî yê Vakurê Kurdîstanî û proses a Rojavayî zî ame nîqaşkerdene. Forum de zî vejîya meydan ke pêşkewtişê heme parçeyan yewbînan ra girêdayî yo. Wina zî rewşê Rojhelatê Mîyanênî forum de ame nirxnayene. Pêşnîyazê çareserîya demokratîke ya seba heme şaran û herêmî, forum de yew ra mijarê nîqaşî bî. Çareserîya problemanê Rojhelatê Mîyanênî aşkera ya. Çareserî bi neteweya demokratîk û demokrasî mumkun a. No zî forum de vejîya meydan.”
Fotoya yewîya kurdan
Ebru Gunaye, fotoya nûnerê kurdan a ke pîya ame girewtene û seba ca ardişê yewîya neteweyî ya kurdan hêvî dana ser o dewam kerd û vat: “Şarê kurdan mîyan de yewîyêk averşina. Sekna yewîya şarî sîyasetmedaran rê erkêk dana. Êrişanê Rojavayî de çar hetanê Kurdîstanî de kurdî payra bîyî û no zî yewîya neteweyî aşkera kerd. Demêko dergî ra dima nûnerê çar hetanê Kurdîstanî no forum de fotoyêko wina vejînayî. Têkilîyê ma bi partîyanê kurdan ê parçeyanê binan reyde ra ver est bî. Labelê cayê yewin o ke nûnerê kurdan yewbînan rê ameyî û no şarî mîyan de hêvî viraşt. Gamêka zaf erênî bî seba têkilîyanê mîyanê kurdan. Konjonktura dinya seba yewîye berpirsyarîyêk dana. No forum de dest pêkerd, labelê seba veraroje ganî hetê kurdan hê xurtir têkilî de bibê. Yê bingeyîn, caardişê kongreya yewîya neteweyî ya. Ganî heme hetî bi menfeetê şarê kurdan tevir bikerê û no menfeet zî yewîya şarê kurdan a.”
‘Keso ke seba aştîye her kesî ra vêşî ked dano, birêz Abdullah Ocalan o’
Ebru Gunaye dîyar kerd ke ê sey DEM Partî Silêmanî de zî Hewlêr de zî bi hetanê kurdan reyde dayene û girewtene kerd û derheqê pêvînayîşanê Başûrê Kurdîstanî de wina vat: “Verî ra ma bi Serekê Herêma Federe ya Kurdîstanî birêz Neçîrvan Barzanî reyde pêvînayîş kerd, dima zî bi Serekê Pêroyî yê YNK’yî birêz Bafil Talabanî reyde. Herdî hetî zî seba prosesê aştîye vindertişêko zaf erênî mojna. Herdî hetan zî dîyar kerd ke seba prosesê aştîye, çi dest ra yeno, do bikerê. Herdî hetan zî bale ante serê rol û mîsyonê birêz Abdullah Ocalanî û vat ke keso ke seba aştîye her kesî ra vêşî ked dano, birêz Abdullah Ocalan o. Prosesê Aştîye û Komelê Demokratîkî ra dima têkilîyê mîyanê kurdan zî xurt bîyî. Ney, partî û sazîyanê Başûrê Kurdîstanî ser o zî tesîr kerd. Ez hêvî kena ke demanê vêrnîya ma de zî nê têkilî do tayêna xurt bibê.”
Rewşa Rojhelatê Kurdîstanî
Ebru Gunaye, qisey ê peyênî de dîyar kerd ke forum de seba rewşa Rojhelatê Kurdîstanî û çareserîya Rojhelat û Îranî zî çend nirnayîşî û muneqeşayî vejîyayî û wina dewam kerd: “Seba çareserîya Rojhelatî zî muzakere û viraştişê têkilîyan lazim o. Helwêsta rejîmê Îranî ya vera kurdan û hêzanê muxalîfan heta nika nêrind bî. Lazim o ke problem bi muzakere û dîyaloge ra bêrê çareserkerdene. Seba heme parçeyan seypêyî û demokratîkbîyayîş lazim o. Heta ke rejîmê Îranî xo nêvurno û demokratîk nêbo, problem çare nêbeno. Ma hêvî kenê ke cehdê ke tede est ê, encam bigîrê.”
