Ordîya Pasdaranê Îranî eşkerayîyêke de da zanayîş ke di keştîyê ke waştêne Neqebê Hurmuzî ra bivîyarê, mayînanê deryayî ro qelebîyayî û her di keştîyan de adir vejîya. Qumandarîya Merkezî ya Hêzanê Amerîka (CENTCOM) zî dîyar kerd ke keştîyêke wexto ke waştêne ambargoya ser Îranî binpay bikero, ameye hedef girewtiş.
Neqebê Hurmuzî de gerginî û astengê verê şîyayîşûmeyîşî keştîyan dewam kenê.
Ajansê xeberan ê resmî yê Îranî ÎRNA’yî ziwanê Ordîya Pasdaranî ra da zanayîş ke di keştîyî wexto ke waştêne bê destûr rayîrêk ra bivîyarê, mayînanê deryayî ro qelebîyayî û her di keştîyan de adir vejîya.
Hetê bînî ra CENTCOM’î zî dîyar kerd ke keştîyêka bazirganîye Kendawê Umanî de waştêne ambargoya deryayî yê Îranî ser bişikno û goş nêda îqazan, coka hetê hêzanê înan ra ameye hedef girewtiş.
ÎRNA’yî şewa vîyarte zî dabi zanayîş ke adaya Qeşmî, Sîrîk, Xask û Bender Ebasî de ke başûrê Îranî de yê, vengê teqayîşan ameyo eşnawitiş. Sebebê teqayîşan hetanî nika nêameyo zanayîş.
