Şaristanê Kirmanî yê Îranî de hîrê hemwelatîyanê Bahaî rê 24 serrî cezaya hepsî ameye dayene.
Şûbeyê Mehkemaya Şorişî yê Kirmanî yê 5. hemwelatîyanê Bahaî, Wenûse Huseynînejad, Şekîla Qasimî û Edîb Şahbazpûrî rê bi pêroyî 24 serrî cezaya hepsî daye. Goreyê xeberanê ke ameyî weşanayene mehkema her yewê nê hîrê hemwelatîyan rê heşt serrî cezaya hepsî daya. Mîyanê sucdarkerdişande ke hemwelatîyan rê ameyî kerdene, îdîayê “endamtîya grûbe”, “kombîyayîş û komplo” û “propagandaya vera rejîmî” est ê.
Wenûse Huseynînejad, Şekîla Qasimî û Edîb Şahbazpûr tarîxanê cîyayan de ameybî destbendkerdene û tepiştene, çend aşman ra pey zî bi kefaletî ameybî veradayene.
Eynî dosya de verê cû Pîyvend Naîmî rê 12 serrî, 6 aşmî û 1 roje, Berna Naîmî rê zî 8 serrî cezaya hepsî ameybî dayene. Bi qeraranê peyênan pêroyîya cezayanê hepsî yê ke panc hemwelatîyanê Bahaî rê ameyî dayene, resaye 44 serrî, 6 aşmî û 1 roje.
