Hemserekê DEM Partî yê Wanî avûkat Veysî Guneşî vat ke tepşê dewlete yo qodanê emnîyetî ser o bêbawerîye virazeno û ard ziwan: “Eke kurdî mabênê xo de îttîfaqêko demokratîk nêvirazê nêeşkenê heqê xo bigîrê û nê prosesî biresnê netîce.”
Vengdayîşê Rayberê Şarê Kurdan Abdullah Ocalanî yê 27ê sibate ra nat serrêk û 8 aşmî vîyartî. Têgêrayîşê Azadîya Kurdîstanî gamê şênberî eştî û xo fesh kerd zî dewlete hîna berpirsîyarîyê xo nêardê ca û seba demokratîkbîyayîşî tu bedilîyayîş nêbîyo. Seke gamê şênberî seba prosesî nêyenê eştene û proses bi giranî yeno ramitene, mîyanê şarê kurdan de endîşeyêka girde virazîyena. Şar û heme beşê komelî pawenê ke hukmat cade gaman bierzo.
Hemserekê Rêxistina DEM Partî yê Bajarê Wanî avûkat Veysî Guneşî ke newe ame weçînayene, derheqê prosesî de qisey kerd û bale anta tepşê dewlete yo qodanê emnîyetî ser o, xeteranê prosesî, hewceyîya garantîyanê huqûqîyan û muhîmîya yewîya neteweyî ser o.
‘Dewlete bi qodanê emnîyetî nêzdî bena, proses tewzîyeno’
Guneşî dîyar kerd ke heme zehmetîyan reyde zî babeta aştîye muhîm a la dewlete hîna zî bi qodanê xo yê kehenan ê ’emnîyetperestan’ nêzdîyê prosesî bena. Guneşî vat ke eke biwazê no proses bi serkewtiş biqedîyo ganî dewlete estbîyayîş, ziwan û kulturê şarê kurdan bi awayêko rasterast nas bikero û ard ziwan: “La rewşa estîye de seke seba nê prosesî garantîyê huqûqîyî nêyenê dayene û dewlete gamanê şênberan nêerzena, no proses tayê vinderto, tewzîyayo.”
‘Xeterê prosesî û problemê bawerîye’
Guneşî hişyarîyê muhîmî derheqê xeteranê prosesî de dayî û di xeterê serekeyî ardî ziwan: “Xetera verêne bêbawerîya komelî ya. Seba ke proses ser bikewo ganî komel beşdar bibo û wayîrê ci bivejîyo la bi sebebê kerdenanê dewlete bawerîya şarê kurdan a prosesî qels bena. Çend ke no proses derg bibo û bi mekanîzmayanê huqûqîyan nêro garantîkerdene, hêzê vera aştîye eşkenê provokasyonan bivejê ver. Dewlete tena wazena hêzanê çekdaran tesfîye bikera la eke amanc tena no bo, no do problemanê girdêran bivejo meydan. Rayberê Şarê Kurdan Abdullah Ocalanî zî zaf reyî nê hişyarîyî dayî.”
‘Waştişo sereke yê şarê kurdan azadîya fîzîkî ya’
Guneşî ard ziwan ke Rayberê Şarê Kurdan Abdullah Ocalanî û Têgêrayîşê Azadîye seba ke proses nêxetimîyo fedakarîyêka girde kerda la heta nika hetê dewlete ra gamê şênberî nêameyî eştene û vat: “Wexto ke ma mîyanê komelî de gêrenê, çîyo tewr eşkera ke keweno verê ma no yo ke ganî Rayber Ocalan cade azadîya xo ya fîzîkî bigîro xo dest. Bedilîyayîşê cayê ey helbet çîyêko eyinî yo la tena bedilîyayîşê cayî nêyeno qebulkerdene.”
‘Muhîmîya îttîfaq û yewîya demokratîke’
Guneşî dîyar kerd ke Abdullah Ocalan zî şarê kurdan ra îttîfaq û yewîye wazeno û qiseykerdişê xo wina qedêna: “Naye ser o tu munaqeşe çin a. Eke kurdî mabênê xo de îttîfaqêko demokratîk nêvirazê nêeşkenê heqê xo bigîrê û nê prosesî biresnê netîce. Ganî şarê kurdan dijberîyanê xo bero hetêk û bi nê îttîfaqî wayîrê Rayberîya xo bivejîyo.”
