Tesîsê maseyanê deqsûran ê qezaya Payîzava de serre de 100 ton maseyî yenê berhemardene. Wayîrê tesîsî Reşat Yilmazî ard ziwan ke seba weşîye ganî maseyê girdî mîyanê tesîsanê xozayîyan de bêrê weyekerdene.
Qezaya Payîzava ya Wanî de serra 2010î de tesîsê maseyan 25 donim erdî ser o ame awankerdene. Tesîsî de maseyî bi rayîranê xozayîyan yenê berhemardene û seba werdî yenê amadekerdene. Tesîsî de maseyê deqsûrî (alabalik) yenê weyekerdene û werdxaneyê verê tesîsî de seba werdî yenê amadekerdene. Zaf hemwelatîyî zî bi sebebê feydeyanê înan ê weşîye hem seba viraştişê keyeyî hem zî seba seyranan nê maseyan ra gênê.
Reşat Yilmazî vat ke 16 serrî yo ê tesîsî de karê maseyîvanîye kenê û serre de 100 ton maseyî berhem danê û ard ziwan: “Tesîsî de cayê maseyanê makîyan, leyîran, yê werdî û cayê berhemardişî cîya-cîya est ê. Serrêk de hakî benê maseyê girdî. Roje de ma 7-8 torbeyî werd danê maseyan û torbeyê werdê maseyan mabênê 2 hezar û 500 û 5 hezar lîrayan de yo. Tesîsê ma 25 donim erdî ser o ame viraştene, destûrê ma 12 wezaretan ra est o û restorantê ma zî est o.”
‘Bi sebebê kêmîbîyayîşê awe maseyî kêmî bîyî’
Yilmazî dîyar kerd ke înan seba ke royê ke mîyanê erdê înan ra vîyareno bixebitnê dest bi berhemardişê maseyan kerdo û vat: “Verê ma bi berhemardişê 49 ton maseyan dest bi karî kerd û 2-3 serran de no berhemardiş bî 100 ton. 2-3 serrî awa ma kêmî bîye û ma nê prosesî de nêzdîyê 100 hezar lîrayan zerar kerd. Tesîsê ma de maseyî nêmendbî. La emser awa ma weş bîye û ma reyna sere ra dest pêkerd.”
‘Ganî maseyî mîyanê betonî de nêrê weyekerdene’
Yilmazî vat ke ê leyîran mîyanê betonî de weye kenê ke nêmirê û ard ziwan: “Bi mecbûrî ma maseyanê hurdîyan mîyanê betonî de weye kenê. Maseyê ma se ra 50 xozayî yê. Ma serre de 2-3 reyî tesîsî pak kenê. Cayê leyîran bi mecbûrî beton o la yê maseyanê girdan herr a, yanî xozayî yo. Eke maseyî mîyanê betonî de bêrê berhemardene tamê înan weş nêbeno. Wexto ke têkilîya maseyan herre reyde bena tamê înan zêde beno. Ma roje de 3 reyî werd danê maseyan. Seba ke awa maseyan, bitaybetî ya leyîran pak bimano ma sîstemê fîltre viraşto û wina hîna biweşî yo. Seba ke tamê maseyanê girdan weşêr bo û hîna biweşîye bibê ganî mîyanê herre yanî xoza de bêrê weyekerdene.”
