Platformê Sazgehanê Demokratîkan, partîyê sîyasîyî û sazgeh û dezgehê komelkî yê demokratîkî bi munasebetê serrgêra 1ê teşrîna peyêne, Roja Kobanî ya Dinya, zaf merkezan de pîrozkerdişî kerdî. Pîrozkerdişî bi rayraşîyayîş, eşkerayî û çalakîyanê cîya cîyayan ameyî kerdiş.
Bi munasebetê 1ê teşrîna peyêne, Roja Kobanî ya Dinya, zaf şaristan û merkezan de pîrozkerdişê xelesnayîşê Kobanî yenê kerdiş. Kobanî hetê çeteyanê DAÎŞ’î û piştîdayoxanê înan ra ameybî dorpêçkerdiş. Kobanî bi xoverdayîşêko bêmesal û bi piştîdayîşêko pîl ke çar parçeyanê Kurdîstanî, Tirkîya û welatanê teberî ra ame, ameye xelesnayîş.
WAN
Platformê Sazgehanê Demokratîkan yê Wanî bi munasebetê serrgêra 1ê teşrîna peyêne, Roja Kobanî ya Dinya, Kuçeya Hunerî ya qezaya Erdîşî ya Wanî de eşkerayîyêk daye. Endam û temsîlkarê partîyanê sîyasîyan, sazgehê sîvîlî û zaf welatijî tewrê eşkerayîye bîyî. Eşkerayîye de pankartê “Vera tarîtîya DAÎŞ’î ma xoverdayîşê Kobanî silam kenê” ame girewtiş. Girseyî sloganê “Biciwîyo xoverdayîşê Kobanî” eşt. Metnê eşkerayîye yo kurdkî îdarekarê rêxistina DEM Partî ya Wanî Alî Atamanî wend.
‘Kobanî de tena estbîyayîş ney, ameyox zî ame pawitiş’
Alî Atamanî dîyar kerd ke serrgêra xoverdayîş û serkewtişê Kobanî de ê xoverdayîşo pîl ke bi îradeya pîyayîye ya şaran ame kerdiş, bi rêz û silam pêşwazî kenê. Ey wina va: “Verê 12 serran Kobanî vera hucumanê tarîyan ê çeteyanê DAÎŞ’î tena estbîyayîş û ameyoxê xo nêpawit. Eynî wextî de erjê azadî, seyyewbînî û cuya pîyayîye ya merdimîye zî pawit. Xoverdayîşo ke vera tarîyîya dorpêçkerdişê şaristanêk werişt, wextêko kilm de sînoran ra vîyart. No xoverdayîş bî şerê pîyayî yê şarê kurdî û hêzanê azadîwaz û demokrasîwazan ê çar hetanê dinya.”
Badê eşkerayîye seba pîrozkerdişê 1ê teşrîna peyêne, Roja Kobanî ya Dinya, ŞanoWan de belgefîlmê Veysî Altayî yo bi nameyê “Nûjîn” ame mojnayîş. Verê mojnayîşê belgefîlmî seba şehîdanê azadî û demokrasî deqîqeyêka rêzgirewtişî ameye girewtiş.
Program bi temaşekerdişê belgefîlmî qedîya.
COLEMÊRG
Colemêrg de bi pêşengîya Platformê Sazgehanê Demokratîkan, 1ê teşrîna peyêne, Roja Kobanî ya Dinya, bi eşkerayî û mojnayîşê sînevîzyonêk ameye pîrozkerdiş.
Qezaya Geverî de zî eşkerayîyêk ame dayîş. Eşkerayîye îdarekara DEM Partî Emîne Yaşare wende. Eşkerayîye de 1ê teşrîna peyêne, Roja Kobanî ya Dinya, ameye pîrozkerdiş. Ame dîyarkerdiş ke şarê kurdî vera wehşetê DAÎŞ’î bi xoverdayîşêko bêmesal, tarîxî û komelkî qezencê xo pawitê. Ame vatiş ke heme dinya bîye şahîdê ruhê xoverdayoxî ke Kobanî de aver şi. Program bi mojnayîşê sînevîzyonî qedîya.
Qezaya Şemzînanî de zî bi munasebetê xelesnayîşê Kobanî eşkerayîyêk ame dayîş û sînevîzyonêk ame mojnayîş.
RIHA
Platformê Sazgehanê Demokratîkan bi munasebetê 1ê teşrîna peyêne, Roja Kobanî ya Dinya, qezaya Pirsûsî ya Rihayî de programêkê pîrozkerdişî kerd. Pirsûs sînorê Kobanî de yo.
Meydanê pîrozkerdişî bi pankartê “1ê teşrîna peyêne, Roja Kobanî ya Dinya Pîroz Bo” ame xemilnayîş. Welatijî bi kincanê xo yê neteweyîyan tewrê pîrozkerdişan bîyî û bi coşêko gird govende çarna. Çalakîye de sloganê “Biciwîyo Serek Apo”, “Biciwîyo xoverdayîşê Kobanî”, “Biciwîyo xoverdayîşê Rojavayî”, “Şehîdî Nêmirenê” û “Jin, Jiyan, Azadî” ameyî eştiş.
‘Kobanî bi pêşengîya cinîyan ameya qezenckerdiş’
Badê rêzgirewtişê seba vîrardişê şehîdanê Kobanî, Hemserekeya DEM Partî ya Rihayî Ayşe Surucu qisey kerd. Aye dîyar kerd ke serkewtişê Kobanî bi pêşengîya cinîyan ame qezenckerdiş û wina va: “Ma şexsê Viyan Peyman û Arîn Mîrkane de heme qehremanan vîr anê. Xoverdayîşêko bêmesal ame kerdiş. 12 serrî verê cû vera DAÎŞ’î bi mucadeleyêko pîl serkewtiş ame qezenckerdiş. Ma Pirsûs ra Şorişê Cinîye yê Rojavayî silam kenê. Seba averşîyayîşê prosesê ke hetê Rayberê Şarê Kurdî Abdullah Ocalanî ra dest pêkerdo, ma venga dewlete danê ke seba averşîyayîşê prosesî ganî lezabez gamî bêrê eştiş.”
Pîrozkerdiş bi çarnayîşê govende û kilamanê hunermendanê herêmkîyan qedîya.
ÎZMÎR
Rêxistina DEM Partî ya Îzmîrî bi munasebetê 1ê teşrîna peyêne, Roja Kobanî ya Dinya, verê Merkezê Kulturî yê Turkan Saylanî yê Alsancakî de eşkerayîyêk daye. Eşkerayîye de pankartê “1ê teşrîna peyêne, Roja Kobanî heme şaranê dinya rê pîroz bo” û “Mîrasê Arînan kampusan de şîn beno” ameyî akerdiş. Sloganê “Jin, Jiyan, Azadî” û “Biciwîyo xoverdayîşê Kobanî” ameyî eştiş. Parlamentera DEM Partî ya Îzmîrî Burcugul Çubuke û zaf kesî tewrê eşkerayîye bîyî. Metnê eşkerayîye Hemserekê DEM Partî yê Îzmîrî Selçuk Odabaşi wend.
‘Kobanî xerîteya mucadeleyê vera kolonyalîzmî ya’
Badê wendişê eşkerayîya çapemenîye, Parlamentera DEM Partî ya Îzmîrî Burcugul Çubuke qisey kerd. Aye dîyar kerd ke Kobanî Rojhelato Mîyanên de vera zihnîyetê ke bi şeran şaran qedêneno, bîye qîrayîşê hêvîye. Aye wina va: “Kobanî nameyê ê çîyî yo ke ma do aştîye bi destanê xo biyarê. Şorişgêrê enternasyonalîstî Kobanî de bîyî bêmerg. Şarê kurdî Kobanî de bî bêmerg. Kobanî eynî wextî de seba ma pêrune xerîteyêka ke mojnayîşê mucadeleyê vera kolonyalîzmî na cografya de ganî senî bêro dayîş. Ma bi çîyanê ke ma Kobanî ra, Rojavayî ra musayê, eşkenê planê şerî yê kolonyalîstan pûç bikerê û aqûbeta xo pîya dîyar bikerê. Ma mecbur ê ke mucadeleyê xo yo pîyayî pîl bikerê. Ma mecbur ê ke kişta yewbînan de bê, aştîye bipawê, aştîye organîze bikerê û peynî de aştîye ameyoxî rê verdê. Rojava, Rojhelat, Bakur, Başûr yan zî na cografya de her şaristan, her herême warê mucadeleyê aştîye yo. Ewro ma reyna şima dawet kenê ke aştîya xo awan bikerê. Ma do ameyoxî di lewanê axayanê şerî mîyan de nêverdê. Bêrê ma pîya axayanê şerî yê kolonyalîstan ke wazenê na cografya parçe bikerê, bişikênê.”
Eşkerayîye bi sloganê “Mîmarê aştîye Îmrali de yo” qedîya.
