Ankara – Endama Heyetê Îmrali yê DEM Partî Pervîn Buldane konferansê cinîyan de qisey kerd. Pervîn Buldane derheqê cayo newe de ke Rayberê Şarê Kurdî Abdullah Ocalan ameyo bicakerdiş, îfade kerd ke vurnayîşê cayî bes nêkeno. Aye wina va: “Tena vurnayîşê cayî bes nêkeno. Lazim o ke statuyê birêz Ocalanî û şertê ey ê xebata azade bêrê caardiş.”
Konferansê cinîyan ê “Ma pîya derheqê ameyoxî de qisey kenê” roja dîyine de salonê Odaya Endezyaranê Înşaatî yê qezaya Çankaya de dewam keno. Konferans ser vengdayîşê 80 cinîyan yeno kerdiş. Mîyanê înan de rojnamegerî, nuştoxî, akademîsyenî, sîyasetmedarî û aktîvîstî est ê. Konferans bi roniştişo yewin dest pêkerd ke sernuşteyê ey “mesulîyetê sîyasetî yê aştîye, çareserîya demokratîke, Meclîs û partîyê sîyasîyî” bî. Moderatorîya roniştişî Gozde Şekere kerde. Roniştiş de Endama Heyetê Îmrali yê DEM Partî Pervîn Buldane, sîyasetmedare Fîlîz Kerestecîoglu, Cagira Serekê Pêroyî yê Yenî Partî Gokçe Gokçene û Grûba Yenî Yolî ra Sema Silkîn Une sey qiseykerdoxan derheqê babete de erjnayîşî kerdî.
Verê roniştişî mesajê kaybaze Fusun Demîrele ame wendiş. Fusun Demîrele mesajê xo de Dayîkê Şemeyî, Behîce Borane û cinîyê pêşengî vîr ardî û va ke ameyoxê înan destê înan de yo.
‘Seba birêz Ocalanî teşekurêko taybetî’
Badê wendişê mesajanê ke konferansî rê ameyê erşawitiş, roniştiş dest pêkerd. Verê cû endama Heyetê Îmrali yê DEM Partî Pervîn Buldane prosesê çareserîye yê verênî vîr ardî û wina va: “Nika prosesî de 3 aktorî est ê: birêz Ocalan, birêz Erdogan û birêz Bahçelî. La aktorî şertanê seyyewbînan de nîyê. Ez pêrune rê teşekur kena la birêz Ocalanî rê bitaybetî teşekur kena. Peynîya peyêne ma 13ê êlule de ada de pêvînayîş kerd û a roje ra nat pêvînayîş nêvirazîyayê. Vindertişêk est o la no vindertiş bi mucadeleyê cinîyan eşkeno bêro vîyarnayîş. Birêz Ocalan tim rolê cinîyan pêşeng vîneno. Meclîs de komîsyonêk zî do bêro awankerdiş. Ganî cinî heme prosesan de rol bigîrê.”
‘Derdê ma tena no yo ke no proses bireso aştîyêka daîmîye’
Pervîn Buldane fotografê Ceylan Onkole û Eren Bulbulî ke sehne ser o ameybî ronayîş, mojnayî û wina va: “Prosesê pêrodayîşan de heme hetî ameyî tesîrkerdiş. Dejê kesêk dejê kesê bînî ra pîlêr nîyo. Seba ke dejê winasî nêbêrê cuyayîş, ganî no proses bireso aştîyêka daîmîye. Coka ganî cinî hîna zaf pêşengîye bikerê. Pêvînayîşanê ke ma mesulanê dewlete reyde kenê de ma qalê vurnayîşê qanûnê bingeyî û weçînayîşî nêkenê. Derdê ma tena no yo ke no proses bireso aştîyêka daîmîye. Belê, hewcedarîya qanûnêko bingeyî yo demokratîk est a. La verê her çîyî hewcedarîya aştîyêka daîmîye est a.”
‘Lazim o ke proses bêro komelkîkerdiş’
Pervîn Buldane dîyar kerd ke lazim o proses bêro komelkîkerdiş û qiseykerdişê xo wina dewam kerd: “Komîsyonêko heqîqetî do bêro awankerdiş yan ney? Ez zî yew Dayîka Şemeyî ya û ê pers kenê ke faîlî do bêrê dîyayîş yan ney. Girewteyê sîyasîyî Fîgen Yuksekdage, Selahattîn Demîrtaş û Leyla Guvene do key bêrê veradayîş? Nê pêro meseleya kurdan ra girêdaye yê. Komel pers keno ke birêz Ocalan do key azad bibo. Meseleya kurdan na ya. Eke ez nêeşka bi ziwanê xo yê dayîke perwerde bivîna, meseleya kurdan na ya. Hema zî Meclîs de kurdkî sey ziwanêko nêzanîyaye yeno vatiş. Meseleya kurdan na ya.”
‘Meseleya kurdan û meseleya demokrasî yewbînan ra girêdaye yê’
Cagira Serekê Pêroyî yê Yenî Partî Gokçe Gokçene zî ard ziwan ke meseleya kurdan û ya demokrasî est a. Aye wina va: “Her di zî yewbînan ra girêdaye yê. Coka ma waşt ke Meclîs de kişta sernuşteyanê bêçekbîyayîşî de sernuşteyê demokratîkbîyayîşî zî bibo. Komîsyonê Meclîsî raporêk zî hedre kerd. La tena yew madeyê raporî ame ca. Vateyê ‘wa verê cû çekî bêrê ronayîş, dima gamê demokratîkî bêrê eştiş’ xelet ê. Helwesta ma ya qanûnê çarçeweyî zî bêbawerîya vera îqtîdarî bîye. Seba ronayîşê çekan belê hewcedarîya rastkerdişanê qanûnîyan est bîye. La no proses bi hawayêko nimite ame kerdiş. Serekê Meclîsî heme partîyî ziyaret kerdî la partîya ma ziyaret nêkerde.”
‘Hewcedarîya ma na ya ke ma pîya meydanan û kuçeyan de bê’
Parlamentera HDP’yî ya verêne sîyasetmedare Fîlîz Kerestecîoglu zî ard ziwan ke aştîye karêko zaf cidî yo û nêyeno verdayîş ke camêrdan û îqtîdarî bipawê. Aye wina va: “Ganî prosesanê verênan de zî ke ameyî şikitiş, îqtîdar nêbîyêne pawitiş. Vanê ke bawerîya şima bi îqtîdarî est a yan ney. Bawerîya ma bi îqtîdarî çin a. Ma mecbur nîyê ke bawerîya ma bi îqtîdarî bibo.”
Fîlîz Kerestecîoglu fotografêkê Cizîrî yê demê şerê xoserîye mojna û wina va: “Ganî a roje ma kişta na dayîke de bîyêne. La o wext ne CHP yê ê wextî ne zî partîyê bînî kişta na dayîke de bîyî. Mi no fotograf bi xo antbî. O wext polîsêkî mi rê va: ‘Vekîlîm, şima çi kenê bikerê, no şer vindarnê.’ Hewcedarîya ma na ya ke ma pîya meydanan û kuçeyan de bê. Verê her çîyî ganî no kulturê bîatî bêro wedaritiş.”
Akademîsyene Arzu Yilmaze zî ard ziwan ke şertanê herême prosesêkê winasî kerdo mecburî. Aye wina va: “Prosesê aştîye yê kurdan û AKP’yî tercîhêk nêbî, mecburîyetêk bî. Îqtîdar zî mecbur mend. No proses bi motîvasyonêkê winasî dest pêkerd û wina zî dewam kerd. Îqtîdarî bi motîvasyonê pawitişê dewlete menfeetê xo nê prosesî de dî.”
Badê qiseykerdişan beşdaran bi rêze qiseykerdoxan ra persî kerdî û derheqê babete de fikr û ramanê xo ardî ziwan.
‘Vurnayîşê keyeyî bes nêkeno’
Pervîn Buldane persa beşdaran a derheqê vurnayîşê cayê Rayberê Şarê Kurdî Abdullah Ocalanî de wina cewab da: “Tena vurnayîşê keyeyî bes nêkeno. Lazim o ke statuyê birêz Ocalanî û şertê ey ê xebata azade bêrê caardiş. Birêz Ocalanî vatbi ke o wazeno rojnameger, rêxistinanê cinîyan û sazgehanê cîyayan ê komelî reyde pêvînayîşan bikero. La hema zî ma ra teber tu kes nêeşkeno şêro pêvînayîş bikero. Verê nika zî wexto ke ma şîyêne Girawa Îmrali, birêz Ocalan ameyêne o keye û ma reyde pêvînayîş kerdêne, dima ageyrayêne cayê xo. La nika êdî do o keye de bimano. La no tena bes nêkeno. Hewcedarîya gamanê şênberan est a.”
