Wan – Hemserekê MED TUHAD-FED’î Kerem Canpolatî ard ziwan ke binpaykerdişê heqanê girewteyanê sîyasîyan her roje hîna giran beno. Kerem Canpolatî wina va: “Hetanî ke Îmrali de birêz Ocalan ser o tecrîd bibo, na rewşe do heme hepisxaneyanê Tirkîya û Kurdîstanî de xo hîna giran bimojno.” Kerem Canpolatî hem zî va ke kitaban nêdanê girewteyan la dima bi mana ‘şima kitab nêwendo’ înfazê girewteyan veşnenê.
Rayberê Şarê Kurdî Abdullah Ocalanî 27ê sibata 2025î de venga “Aştîye û Komelê Demokratîkî” dabi û prosesêk dest pêkerdbi. Badê na venge zaf reyan derheqê heqanê girewteyan û polîtîkayanê taybetîyan ê ke hepisxaneyan de yenê caardiş de munaqeşeyî ameyî kerdiş. La rixmê naye zî polîtîkayê ke hepisxaneyan de yenê caardiş nêqedîyayî. Bi tersê naye, rewşe her roje hîna xirab bena.
Hemserekê MED TUHAD-FED’î Kerem Canpolatî ajansê ma rê qalê polîtîkayanê dewlete kerd. Ey venga rindkerdişê rewşa hepisxaneyan da.
‘Sozê ke ameyê dayîş, nêameyê caardiş’
Kerem Canpolatî destpêkê qiseykerdişê xo de dîyar kerd ke ê sey federasyonî vera binpaykerdişanê hepisxaneyan hem çalakîyanê demokratîkan kenê hem zî Wezaretê Edaletî reyde pêvînayîşan kenê. La herçiqas wezaretî 2-3 reyan sozê rindkerdişê şertan dayo zî hetanî nika tu gamo erênî nêameyo eştiş.
Kerem Canpolatî qetî kerd ke prosesê di serran û vateyê sîyasetê teberî zereyê hepisxaneyan de xo nêmojnayo. Ey wina va: “Bi tersê naye, zextê girewteyan ser o zêde benê. Hepisxaneyan de gardîyanî girewteyanê sîyasîyan tehdîd kenê. Ê vanê ke do înan bibê mîyanê girewteyanê edlîyan, ê vanê ke proses do biqedîyo û cenazeyî do vejîyê. Hem zî girewteyan nêbenê nêweşxaneyan, warê înan ê sosyalî qedexe kenê û înan ceza kenê. Demanê peyênan de girewteyê ke cezayê înan qedîyayo, 5 serran ra bigîre heta 30 serran, wextê xo de nêyenê veradayîş. Kitaban nêdanê înan û dima bi maneya ‘şima kitab nêwendo’ înfazê girewteyan veşnenê û veradayîşê înan taloq kenê.”
‘Keyeyê girewteyan nêeşkenê şêrê pêvînayîşê domananê xo’
Kerem Canpolatî bale ante sirgunkerdişê girewteyan ê şaristananê dûrîyan ser. Ey da zanayîş ke no tena helwesta îdare yan zî dozgeran bi xo nîya, polîtîkayêka esasîye ya dewlete ya.
Kerem Canpolatî dîyar kerd ke krîzê ekonomîyê pêroyî de keyeyî zî hetê ekonomî ra problemî cuyenê û nêeşkenê şêrê pêvînayîşê domananê xo. Ey wina dewam kerd: “Bi no hawa dayîk, pî, wa, bira û cinî-mêrdeyê girewteyan teber de yenê cezakerdiş. Ê înan rê mesajêkê wina danê: ‘Domanê şima no çî kerdo, ma do şima rê zî wina bikerê.’ Ê girewteyan erşawenê şaristananê dûrîyan ke uca komelê kurdan kêm o. Wina wazenê ke polîtîkayanê xo yê negatîfan nê hepisxaneyan de hîna rehet bica biyarê.”
‘Ganî girewteyî keyeyê xo ra nêzdî bê’
Kerem Canpolatî ard vîr ke ê sey keyeyan verê cû zî seba na babete Ankara de çalakî kerdê. Seba ke dewlete na polîtîkaya xo ra fek veradana, ê şîyê Meclîs û Wezaretê Edaletî. Ey wina va: “Heme şaristananê Tirkîya û Kurdîstanî de hepisxaneyî est ê. Çîyo ke nika Tirkîya de tewr zaf esto, hepisxaneyî yê. Ganî her girewte keyeyê xo ra nêzdî bo. Ganî dewlete hem emnîyet, weşî û heqanê merdimîyan ê girewteyan hem zî şîyayîş û ameyîşê keyeyan bifikirîyo. Dinya de nimûneyê naye zaf ê, la heyf ke Tirkîya demêko derg o na babete de rayîrê xirabîye de şona.”
‘Ganî Rayberê Şarê Kurdî Abdullah Ocalan bêro veradayîş’
Kerem Canpolatî peynîya qiseykerdişê xo de bale ante girêdayîşê mabênê sîstemê Îmrali û hepisxaneyanê bînan ser. Ey qiseykerdişê xo wina qedêna: “Tecrîdê Îmrali heme hepisxaneyan de xo mojneno. Wexto ke ma qalê azadkerdişê Rayberê Şarê Kurdî Abdullah Ocalanî û qedîyayîşê tecrîdê Îmrali kenê, ma vanê ke hetanî ke Îmrali de birêz Ocalan ser o tecrîd bibo û şiyayîş û ameyîş û pêvînayîşan de problemî bibê, na rewşe do heme hepisxaneyanê Tirkîya û Kurdîstanî de xo hîna giran bimojno. Coka ganî tecrîd biqedîyo û berê Îmrali abo. Waştişê komelî û yê federasyonê ma azadîya fîzîkî ya birêz Ocalanî ya. Wina do bieşko rolê xo bigêro û bê avûkatan yan zî heyetan bi xo raşteraşt bireso akademîsyenan, sîyasetmedaran û heme temsîlkaranê komelê Kurdîstan û Tirkîya. Hetanî ke uca rehetîyêk nêvirazîyo, ma zanê ke hepisxaneyanê Tirkîya û Kurdîstanî de zî tu çî nêvirazîyeno. Çunke nê yewbînan ra girêdaye yê.”
