Rayberê Dînî yê Îranî Mucteba Hamaneyî Amerîka û Îsraîlî rê îqazêko sert da. Mucteba Hamaneyî da zanayîş ke heme serwet û çimeyê înan ê madî û manewî do bibê hedefê raşteraşt ê hêzanê Îranî.
Sîteyê resmî yê Rayberê Dînî yê Îranî derheqê tehdîdanê sertan ê Mucteba Hamaneyî de xeberêk weşanaye. Mucteba Hamaneyî nê tehdîdî kombîyayîşê fermandaranê eskerîyan ê welatî de kerdê.
Goreyê sîteyî Mucteba Hamaneyî dîyar kerdo ke eke dişmenî reyna hucumanê eskerîyan yan terorîstîyan dest pêbikerê, peynîya nê şerî goreyê waştiş û keyfê înan nêbena. Hêzê çekdarî û şarê Îranî bi xo do wext û şertanê qedîyayîşê şerî dîyar bikerê.
Ame vatiş ke Mucteba Hamaneyî ferman da ke lîste û bankaya hedefanê eskerîyan bêra rojanekerdiş. Wina do heme menfeet, serwet û çimeyê dişmenanê amerîkîyan û îsraîlîyan bikewê ver hucumanê raşteraşt ê hêzanê çekdaran ê Îranî.
Goreyê eynî çimeyî Mucteba Hamaneyî waşto ke îstîxbaratê eskerî bêro xurtkerdiş û teknolojîya modern bêra xebitnayîş. Ey qetî kerd ke vera her tewir tehdîdî hedrebîyayîşo temam û cewabdayîşo tewr lez lazim o. Ey eynî wextî de waşt ke rindkerdişê rewşa cuye û ekonomîya endamanê hêzanê çekdaran rê muhîmîyêka taybetîye bêra dayîş.
