Amed – Endama YJA Star’î Rojbîn Sonmeze (Dilzar Rêber Andok) serrgêra şehadeta xo ya yewine de Amed de ame vîrardiş. Vîrardiş de ame dîyarkerdiş ke ewro sayeyê nê şehîdan şarê kurdî hîşyar bîyo. Ame vatiş ke seba ke no proses ser bikewo, ganî şarê kurdî dest bido destê Rayberê Şarê Kurdî.
Endama YJA Star’î Rojbîn Sonmeze (Dilzar Rêber Andok) 31ê teşrîna verêna 2025î de Qendîl de cuya xo vînd kerdbî. Aye serrgêra şehadeta xo ya yewine de salonêk taybetî yê qezaya Rezanî ya Amedî de ame vîrardiş. Keyeyê Rojbîn Sonmeze, îdarekarê MEBYA-DER’î yê Amedî, endamê partîyanê sîyasîyan û sazgehanê komelkîyan û zaf welatijî tewrê vîrardişî bîyî. Salon de fotografê Rayberê Şarê Kurdî Abdullah Ocalanî û Rojbîn Sonmeze maseyî ser o ameyî ronayîş. Pankartêko “Her mîlîtan beno tarîxêk” zî ame daliqnayîş. Program bi wendişê duayan û mewlûdî dest pêkerd. Dima seba şehîdanê Têgêrayîşê Azadîye deqîqeyêka rêzgirewtişî ame girewtiş û marşê “Çerxa Şoreşê” ame wendiş. Wexto ke marş qedîya, girseyî sloganê “Şehîdî Nêmirenê” eşt.
‘Ma do mucadeleyê xo bi qerardarî dewam bikerê’
Badê rêzgirewtişî bi nameyê keyeyî birayê Rojbîn Sonmeze Murat Sonmezî qisey kerd. Murat Sonmezî dîyar kerd ke wayîrvejîyayîşê mîrasê şehîdanê Têgêrayîşê Azadîye û bedelanê ke înan dayê, şerefo tewr pîl o. Ey wina va: “Ma bi şehadeta înan serberz ê. Ma verê vîrardişê înan bi hurmet sereyê xo ronanê. Ma ca yo vengo ke înan peyê xo de verdo bi hesret, erjanê ke înan viraştê zî bi minetdarîyêka bêpeynî vîr anê. Hetanî ke ma ameyoxêko azad û bişeref awan bikerê ke înan xeyal kerdêne, ma do mucadeleyê xo bi qerardarî dewam bikerê. Ma înan xo vîr ra nêkerdê û ma do nêverdê ke bêrê vîrakerdiş. Ma do vîrardişê înan mucadeleyê xo de ganî bimojnê.”
‘Ewro sayeyê nê şehîdan ma hîşyar bîyê’
Badê Murat Sonmezî îdarekara MEBYA-DER’î ya Amedî Menîce Yenî bale ante Prosesê Aştîye û Komelê Demokratîkî ser. Aye wina va: “Werekna ewro ma seba vîrardişan ney, seba şayîye bîyêne kişta yewbînan. Ma verê xo danê kotî, nameyê şehîdan uca ma pêşwazî keno. Ewro sayeyê nê şehîdan ma hişyar bîyê. Seba înan ma do dest bidê destê Rayberê Şarê Kurdî û no proses bi hawayêko serkewte rayra berê.”
Badê qiseykerdişan programê vîrardişê Rojbîn Sonmeze bi mojnayîşê sînevîzyonêk qedîya.
