Seba caardişê qerarê “heqê hêvî” yê derheqê Rayberê Şarê Kurdî Abdullah Ocalanî de 50 welatan ra 845 îmzayî ameyî arêkerdene. Îmzakaran ra ke mîyanê înan de 109 wayîrê Xelata Nobelî zî est ê, venga Konseya Ewropa da ke gamanê şênberan bierza.
Çarçewaya kampanyaya mîyanneteweyî ya “Seba Abdullah Ocalanî Azadî, Çareserîya Sîyasî Seba Meseleya Kurdî” de seba tatbîqkerdişê qerarê “heqê hêvî” ke Mehkemeya Heqanê Merdiman a Ewropa (MHME) 2014î de derheqê Rayberê Şarê Kurdî Abdullah Ocalanî de dayo, welatanê cîyayan de mektubî ameyî amadekerdene û kampanyayê îmzayan ameyî organîzekerdene. Mektubanê de ke resayê Komîteya Wezîran a Konseya Ewropa, ame waştene ke Tirkîya qeraranê MHME’yî bîyara ca bikera.
Goreyê agahîyanê organîzatoranê kampanya, çarçewaya xebatan de ke serre de ameyî ramitene, 50 welatan ra bi pêroyî 845 îmzayî ameyî arêkerdene. 109 wayîrê Xelata Nobelî, 132 temsîlkarê weçînayeyî, 127 rêxistinê komelê sîvîlî û 20î ra zêde sendîkayan piştî daye xebatan.
109 wayîranê xelata Nobelî ra piştgirî
Çarçewaya xebatanê mîyanneteweyîyan de wayîranê Xelata Nobelî ra teber parlamenterî, temsîlkarê partîyanê sîyasîyan, akademîsyenî, huqûqnasî, sendîkakarî û pawitoxê heqanê merdiman dormeyê waştişê tatbîqkerdişê heqê hêvî de ameyî têhet. Mektubanê kampanya de ame waştene ke Tirkîya qeraranê MHME’yî bîyara ca, derheqê rewşa huqûqî ya Rayberê Şarê Kurdî Abdullah Ocalanî de gamî bêrê eştene û astengîyê vernîya rolê ey ê dîyarker ê Prosesê Aştî û Komelê Demokratîkî de bêrê hewanayene. Xebatanê îmzayan de ame dîyarkerdene ke caardişê heqê hêvî meseleyêka huqûqî ya şexsî ra wetêr seba çareserîya demokratîke ya meseleya kurdî û averberdişê aştîyêka menda zî muhîm o.
Badê xebatanê serrêk kampanya bale anta kombîyayîşê heqanê merdiman ê Komîteya Wezîran a Konseya Ewropa ser o ke do 1-3ê kanûna 2026î de bêro kerdene. Na çarçewa de peynî de mektubêka cîya ke bi piştîdayîşê 620 îmzakaranê 29 welatan ameye amadekerdene, Komîteya Wezîran rê ameye erşawitiş. Mektube de ame waştene ke Tirkîya seba tatbîqkerdişê heqê hêvî yê Abdullah Ocalanî berpirsîyarîyanê xo bîyara ca û Konseya Ewropa qeraranê şênberan bigîro. Organîzatorê kampanya kombîyayîşê kanûne ra ver pêdîyayîşanê rasterastan temsîlkaranê daîmîyan ê welatan reyde hedef kenê. Ame dîyarkerdene ke sîyasetmedar, wayîrê Xelata Nobelî, akademîsyen, sendîka û pawitoxê heqanê merdiman ê herêmanê cîyayan ê dinya do bi nê pêdîyayîş û cehdanê bînan bale biancê heqanê huqûqîyan ê Rayberê Şarê Kurdî Abdullah Ocalanî û rolê ey ê prosesê aştî ser o.
Seba gamanê şenberan vengdayîş
MHMEyî qerarê xo yê Ocalan/Tirkîya (Hûmare 2) yê 18ê adare 2014î de dîyar kerd ke tatbîqkerdişê cezaya hepsê heteheta ya girankerda bi mekanîzmayêkê newera erjnayîşî ke îhtîmalê verdayîşî temîn keno, vera Peymana Heqanê Merdiman a Ewropa ya. Berpirsîyarîya Tirkîya ya tatbîqkerdişê nê qerarî binê çimdarîya Komîteya Wezîran a Konseya Ewropa de ya. Organîzatoranê kampanya waşt ke tatbîqkerdişê qerarî hîna zêde nêro taloqkerdene, heqê hêvî bigîrîyo garantî û gamê bêrê eştene ke beşdarîya Rayberê Şarê Kurdî Abdullah Ocalanî ya prosesê aştî bi şertanê azadan temîn bikerê.
Yeno pawitiş ke kombîyayîşê Komîteya Wezîran a Konseya Ewropa yê 1-3ê kanûna 2026î de babeta tatbîqkerdişê qeraranê MHME’yî yê derheqê heqê hêvî de reyna bêra munaqeşakerdiş.
