Endamê Fermandarîya Qerargehê Merkezî Murat Karayilanî dîyar kerd ke bi heme gamanê înan ê yewhetan zî dewleta tirke heta nika tu qanûn nêveto. Murat Karayilanî vat ke ganî dewlete çîyê ke kurdan ser o vana, bikero qanûn û ganî Rayber Apo agêrayîşê gerîlayan pêşwazî bikero.
Endamê Fermandarîya Merkezê Pawitişê Şarî (NPG) Murat Karayilanî keyepelê The Amargi rê roportajêk da. Murat Karayilanî roportaj de Prosesê Aştî û Komelê Demokratîkî, azadîya fîzîkî ya Rayber Apoyî û hewcedarîya gameeştişê dewleta tirke ser o qisey kerd.
‘Ma tu hetî rê alîgir nîyê’
Murat Karayilanî rayîrê çareserîye û xeta Rayber Apoyî ser o wina vat: “Ma çareserîye şer de nêvînenê; no şer feydeyê şaran û dinya nîyo. Ma temsîlkarîya xeta demokrasîya şaran kenê û nê şerî de terefgirê tu hetî nîyê; ma xeta hîrêyine, yanî demokrasî, xo rê kenê binge. Çare modelê demokrasî û konfederalîzmê Rayber Apoyî yo; yanî bingeyê azadîya cinîye û awankerdişê komelêko demokratîk ser o feydeyê kurd, ereb, tirk, asûrî, suryanî û heme komelanê herême.” Murat Karayilanî dîyar kerd ke Rayber Apo Îmrali ra têkoşînêko neteweyî ramneno; tena seba Vakurê Kurdîstanî nêxebitîyeno, mîyanê alozîyanê herême de wazeno kurdan rê ca û statuyêk awan bikero. Goreyê Murat Karayilanî, dewlete waşt ke mîyanê Têgêrayîşê Azadîye de û mabênê têgêrayîşî û şarî de îxtîlafan virazo. La şar û Têgêrayîşê Azadîye bi yew qerarî Rayber Apoyî dima vindertê.
‘Ganî statuyê Rayber Apoyî bi huqûqî dîyar bibo’
Murat Karayilanî dîyar kerd ke bi şer tu mesele çareser nêbena: “Têkoşînê ma yê 53 serran têkoşînêko fedayîyane bî û ma resayê na bawerîye ke bi şer tu mesele çareser nêbena. Nika ma wazenê sîyaset bikerê û meseleya kurdan bi aştîyane çareser bikerê. Ma prosesê aştîye sey prosesê têkoşînî vînenê. Nêzdîyê di serran o ke proses dewam keno la dewleta tirke heta nika tu gamêk qanîker nêeşta. Proses ne hetê ma û dewleta tirke ra, hetê Rayber Apoyî ra yeno îdarekerdene. Rolê Rayber Apoyî rêxistinkerdişê aştî û sîyasîbîyayîşî yo; ganî statuyê ey bi huqûqî bêro dîyarkerdene, çunke o muzakerekarê bingeyên û koordînatorê prosesî yo. Ma azadîya Rayber Apoyî ra teber tu çî qebul nêkenê; ganî o bi fîzîkî azad bibo. Dewlete behsê kurdan kena; ma vanê çîyo ke şima qebul kenê, bikerê qanûn û binusê.”
‘Gerîla Vakur ra vejîya, metropolan ra zî vejîyenê’
Murat Karayilanî behsê antişê hêzanê gerîlayan kerd: “Ma par ra nat heme hêzê xo yê sînorê Vakurê Kurdîstanî, Amed, Botan û Tirkîya ra antî û no proses aşma êlule de qedîya. Tena beşê hêzanê ma yê taybetan metropolanê Tirkîya de, sey Îstanbul û şaristananê bînan, mendê; ma talîmat dayo ke ê zî bêrê antene. Dewleta tirke 2021 ra nat bi piştîdayîşê NATO’yî û bi heme çekanê kîmyewîyan cehd kerdêne ke Metîna kontrol bikero la ser nêkewtêne. Ma 8ê teşrîna verêne de hêzê xo Metîna ra zî antî; no seba mojnayîşê nîyetê ma yê rindî bî. Ma têkoşînê çekdarî qedêna; ganî dewlete êdî kurdan ra nêtersîyo. Qanûnê Çarçewayî tena xo bes nêkeno, kêmanîyê ey zaf ê.”
‘Ganî Rayber Apo gerîlayan pêşwazî bikero’
Murat Karayilanî vat ke ganî Rayber Apo bieşko gerîlayan pêşwazî bikero û gerîlayê azadîye bieşkê Tirkîya de bixebitîyê: “Çîyo ke koyan de kerdêne, nika bajaran de bikerê la bi çekan ney, bi rayîrê sîyasetî. Ma heta nika zaf gamî eştê; veşnayîşê çekan ra bigîre heta viraştişê kongreyî û antişê hêzanê xo. La heta ke dewlete gamêk newe û qanîker nêerzo, seba ronayîşê çekan tu bawerî çin a. Seba ke gerîla çekan ra fek verdo, ganî dewleta tirke Rayber Apoyî ser o qerarêk bido.” Murat Karayilanî peynî de vat: “Amancê ma tena çareserkerdişê meseleya kurdan a Tirkîya nîyo; ma wazenê Tirkîya de demokrasîye xurt bikerê û komare bivurnê komarêk demokratîk. Tirkîya endama NATO’yî bo yan nêbo, ma nêwazenê bibo hêzê leşkerî yê kesî; ganî bibo hêzêko aştî û azadîye yê Rojhelatê Mîyanênî.”
