Sêrt –Medîha Înce, dayîka endamê Têgêrayîşê Azadîye Kurdîstanî Çekdar Berxwedanî ke 2018î de ganê xo ra bîbî, waşt ke aştîyêka daîmîye bêro ca û wina vat: “Heta ke ma bieşkê ma do dewa û şehîdanê xo dima bê.”
Kurdîstan û Tirkîya de zaf şaristanan de aşmanê tebaxe û êlule de gerîlayê Têgêrayîşê Azadîya Kurdîstanî ameyî vîrardiş. Nê keyeyan ra yew zî keyeyê şehîd Çekdar Berxwedanî (Cemîl Înce) bî. Çekdar Berxwedan 1999î de Îstanbul de ameyo dinya. Ey heta mektebê mîyanênî wend û wendekarêko zaf serkewte bî. Seba ke rewşa keyeyî ya ekonomîk xirab bîye, destmalî rotî û bi no qayde mekteb zî wendêni. Badê cû keye Îstanbul ra ame Sêrt. Çekdar uca mîyanê ciwanan de xebitîya û 2015î de şi koyanê Kurdîstanî. New aşman ra pey ame Vakurê Kurdîstanî; qezaya Serêkanîye ya Riha de ame girewtiş û hepisxaneyanê Riha û Ankara de mend. 2017î de ame veradayîş, demêk keyeyî het mend û dima reyna tewrê xebatan bî. Çekdar Berxwedan 2yê tebaxa 2018î de Qadanê Pawitişê Medya yê Başûrê Kurdîstanî de şehîd bî. Medîha Înce cuya lajê xo ser o qisey kerd.
‘Xebate ra zaf hes kerdêne’
Medîha Înce dîyar kerd ke lajê aye mekteb de wendekarêko serkewte û jîr bî û wina vat: “Pîlan reyde pîl bî, domanan reyde zî doman bî. Kaykerdişê topî û temaşakerdişê maçan ra zaf hes kerdêne. Vatêne ‘Ez do mektebê xo biwana’. Mekteb ra amêne keye, zaf nêşîyêne teber. Badê cû dest bi rotişê destmalan kerd; seba ke mekteb biwano no kar kerdêne. Seba ke rewşa ma ya ekonomîk xirab bîye ez zî şîyêne karê pakîye. Tayê rey pîyê xo reyde şîyêne partî û bi no qayde têkilîya ey ciwanan reyde virazîya; dima dest bi xebatan kerd. Wexto ke çalakîyêk bîyêne ma berê xo qefilnayêne û pîya şîyêne tewr bîyêne.” Medîha Înce îfade kerd ke lajê aye 2015î de tewr bî û verê şîyayîşî zaf çalakîyan de ca girewtêne.
‘Badê 9 aşman ame girewtiş’
Medîha Înce dîyar kerd ke Çekdar badê 9 aşman qezaya Serêkanîye ya Riha de ame girewtiş: “Ey ardbî Riha û mi rê telefon kerd, vat: ‘Ma lajê to girewto.’ Roja 4ê nîsane bî. Roja dîyine ma şîyê hepisxane. Mi dî ke Çekdar ame la rengê ey nêweş bî. Mi ey rê vat: ‘Lajê mi, her di hetanê ma de kamerayî est ê, mebermê; wa dişmen ma ra nêhuyo.’ Wexto ke ame girewtiş vera ey zaf şîdet ame kerdiş. Mi persa ey vat ‘ez nêkuwaya’, la pîyê xo rê vatbî ‘zaf şîdet vera mi ame kerdiş’. Nêeşkayêne linganê xo ser o vindero. Wexto ke mi no fehm kerd, Mazlum Dogan ame verê çimanê mi.”
‘Parekerdiş ra zaf hes kerdêne’
Medîha Înce îfade kerd ke lajê aye hepisxaneyê Riha ra sirgunê hepisxaneyê Ankara bî û çend aşmî badê cû ame veradayîş: “Badê ke ame veradayîş zî nêvindert. Demêko derg keye de mend. Merdimêko zaf fehmdar bî û parekerdiş ra zaf hes kerdêne. Mi ey rê vat ‘xebatanê xo tîya bike’, la ey vatêne: ‘Dayê, dayîkê sey to zaf ê.’ Vatêne: ‘Wexto ke merdim soz dano, ganî sozî ser o vindero.’ Badê demêk şi. Hîrê serran ra ver tayê embazî amê keyeyê ma û vat ‘ma to rê mizgînî arda’. Mi zaf meraq kerd; fotografê ey bî. La ma nêzanayêne ke şehîd bîyo.”
‘Ma do dewa û şehîdanê xo dima bê’
Medîha Înce waşt ke aştîyêka daîmîye bêro ca û qiseykerdişê xo wina qedêna: “Ma wazenê ke heme gerîlayê koyan bêrê. Ganî embazê ke hepisxaneyan de yê bi no proses bêrê veradayîş. Wa êdî weşî bikewo dinya. Heta ke Serekîye azad nêbo û kurdkî Meclîs de qebul nêbo, azadîya kurdan nêyena ca. Heta ke ma bieşkê ma do dewa û şehîdanê xo dima bê. Estbîyayîşê ma nasname, ziwan û welatê ma yo. Êdî no zulm û zor bes o; binê erdî pêro pirr bîyo. 50 serrî yo ke no şer est o û her kes zano ke no şer kurdan ser o ramîyeno. Ma wazenê yewîya xo xurt bikerê û welat, erd û beyraqa xo berz bikerê ke ma biresê azadîye.”
